20 май веломарафони ҷумҳуриявӣ доир мегардад

ДУШАНБЕ, 03.05.2017 /АМИТ «Ховар»/. 20 майи соли равон дар қаламрави кишвар веломарафони ҷумҳуриявӣ баргузор мегардад.
Тавре аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд, дар марафони мазкур намояндагони вилоятҳо ва шаҳру ноҳияҳои тобеи марказ бо теъдоди 7 нафарӣ аз Хоруғ, Хуҷанд, Кӯлоб, Қӯрғонтеппа, Турсунзода ва Рашт ба шаҳри Душанбе ҳаракат намуда, дар веломарафони пойтахт низ иштирок мекунанд.
Онҳо ҳамчун рамзи дӯстӣ ва ваҳдату якдилии ҷавонон дар рӯзи Дави миллӣ ва ҳамоиши ҷавонону Рӯзи ҷавонони Тоҷикистон- 23 май иштирок намуда, аз номи ҷавонони минтақаҳои кишвар намояндагӣ мекунанд.
Веломарафони ҷумҳуриявӣ дар доираи чорабиниҳои Соли ҷавонон роҳандозӣ шуда, он тибқи хатсайри зерин доир карда мешавад:

1. Хоруғ- Шуғнон-Рӯшон- Ванҷ-Дарвоз-Шамсиддин Шоҳин-Кӯлоб- Восеъ- Данғара-Норак-Ваҳдат- Душанбе;
2. Хуҷанд-Спитамен-Истаравшан- Шаҳристон- Айнӣ- Варзоб- Душанбе;
3. Кӯлоб- Восеъ- Данғара- Норак- Ваҳдат-Душанбе;
4. Рашт-Нуробод-Роғун-Файзобод-Ваҳдат-Душанбе;
5. Кӯрғонтеппа-Абдураҳмони Ҷомӣ-Хуросон- Рӯдакӣ-Душанбе;
6. Турсунзода- Шаҳринав- Ҳисор-Душанбе.