Ба Дастури Маҷлиси миллӣ тағйиру иловаҳо ворид карда шуданд

ДУШАНБЕ, 18.05.2017 /АМИТ «Ховар»/. Минбаъд  хизматчиёни  давлатии Дастгоҳи Маҷлиси миллии Маҷлиси Олии Ҷумҳурии Тоҷикистон ба истиснои кормандони техникӣ аз ҷониби Раиси Маҷлиси миллӣ таъйин карда мешаванд. Қаблан ин рисолат бар дӯши  Роҳбари Дастгоҳи палатаи болоии Парлумони Тоҷикистон вогузор гардида буд. Дар робита ба ин 18 май дар иҷлосияи даҳуми Маҷлиси миллӣ ба «Дастури  Маҷлиси миллии Маҷлиси Олии Ҷумҳурии Тоҷикистон»  тағйиру иловаҳо ворид карда шуданд.

Арамбегим Маҳтобшозода, раиси Комиссия оид ба назорати дастури  Маҷлиси миллӣ,  зимни тавзеҳи масъалаи мазкур гуфт, ки ин тасмим бо назардошти баланд бардоштани  масъулияти хизматчиёни давлатии Палатаи  болоии Парлумони кишвар гирифта шудааст. Ҳамзамон аъзои Маҷлиси миллӣ ба «Низомномаи Дастгоҳи  Маҷлиси миллии Маҷлиси Олии Ҷумҳурии Тоҷикистон» тағйиру иловаҳо ворид намуданд.

Маҷлиси миллӣ палатаи болоии Парлумони Тоҷикистон буда, соли 2000 таъсис дода шудааст ва  33 нафар аъзо дорад.