Дар Душанбе бахшида ба Соли ҷавонон дар Майдони «800-солагии Москва» барномаҳои фарҳангӣ, бадеӣ ва фароғатӣ баргузор мегарданд

ДУШАНБЕ, 03.05.2017. /АМИТ Ховар/. Қарори Раиси шаҳри Душанбе Рустами Эмомалӣ «Оид ба ташкили барномаҳои фарҳангӣ, бадеӣ ва фароғатӣ дар Майдони «800-солагии Москва» бахшида ба Соли ҷавонон» ба тасвиб расид.
Тавре аз Раёсати иттилоот ва равобити хориҷии дастгоҳи Раиси шаҳри Душанбе хабар доданд, бо ин қарор нақшаи баргузории барномаҳои мазкур тасдиқ гардида, Раёсати фарҳанги шаҳри Душанбе дар ҳамкорӣ бо вазоратҳои фарҳанг ва корҳои дохилии Ҷумҳурии Тоҷикистон, Иттифоқи нависандагони Тоҷикистон барои таъмини иштироки дастаҳои ҳунарӣ ва шоирону нависандагон дар ҷойи баргузории чорабинӣ вазифадор гардидаанд.
Тибқи нақшаи тасдиқшуда барномаҳои фарҳангӣ, бадеӣ ва фароғатӣ дар Майдони «800-солагии Москва» аз 29 апрел то 24 июни соли 2017, аз соати 18:30 то 20:00 баргузор мегарданд.
Хотиррасон менамоем, ки дар ин давра Ансамбли давлатии «Сомон», Консерваторияи миллии Тоҷикистон, Ансамбли давлатии хизматнишондодаи «Лола», Иттиҳодияи давлатии гурӯҳҳои эҷодиву консертӣ, дастаҳои ҳунарии Раёсати фарҳанги шаҳри Душанбе, Иттиҳодияи давлатии сафарию ҳунарии «Базморо», Театри давлатии академии опера ва балети ба номи С.Айнӣ, Филармонияи давлатии Тоҷикистон ба номи А.Ҷӯраев ва Ансамбли «Сипар»-и Вазорати корҳои дохилии Ҷумҳурии Тоҷикистон бо барномаҳои рангини консертӣ хотири ҳаводорони санъати мусиқиро шод мегардонанд.