Дар Ишкошим аъзои аксари хоҷагиҳои деҳқонӣ картошка мешинонанд

ХОРУҒ, 30.05.2017. /АМИТ «Ховар»/. Дар ноҳияи Ишкошим соли равон бинобар сардии ҳаво ва боришоти шадид кишту кори баҳорӣ каме ба таъхир афтод, аммо деҳқонон кӯшиш доранд, ки то даҳаи аввали моҳи июн мавсими корҳои саҳроиро ба итмом расонанд. Онҳо имсол дар майдони беш аз 2 ҳазор гектар маҳсулоти ғалладонагиву сабзавот кишт мекунанд.
Дар маркази ноҳияи Ишкошим 7 хоҷагии деҳқонӣ мавҷуданд. Ин хоҷагиҳо дар ихтиёри худ наздики 700 гектар замини киштбоб доранд ва бештари онҳо дар қитъаи замини худ картошка мешинонанд, зеро боду ҳаво ва обу хоки ин ноҳия барои ба даст овардани ҳосили хуби картошка хеле мусоид мебошад. Сифати ин намуди маҳсулот баланд шуда, он дар бозори шаҳри Хоруғ харидорони зиёд дорад.
Яке аз деҳқонони ботаҷрибаи ноҳия Имомдод Мамадёқубов гуфт, ки 15 сол боз бо замин сару кор дорад ва бо истифода аз таҷрибаи чандинсола дар бораи таркиб ва хосияти хоки ин қитъаҳои замин маълумоти кофӣ ҷамъоварӣ кардааст. «Дар чанд соли охир мо аз истифодаи нуриҳои кимиёӣ даст кашида, ба киштзорони худ танҳо нуриҳои органикӣ мепошем. Солҳои қаблӣ ба хотири афзоиши маҳсулот бештар аз нуриҳои кимиёӣ истифода мебурдем, ки бештари маҳсулот дар фасли зимистон сифати худро гум мекард. Аммо ҳоло ҳосили картошка ба ҳама гуна сардӣ тобовар аст ва онро ба муддати то 6 моҳ захира кардан мумкин мебошад»,-мегӯяд ин деҳқони пуртаҷриба.