Дар натиҷаи заминларза ду хона зарар дидааст

ДУШАНБЕ, 03.05.2017. /АМИТ «Ховар»/. Мувофиқи маълумоти пешакии Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар натиҷаи заминларзае, ки имрӯз соати 09:47 бо вақти маҳаллӣ дар Тоҷикистон рух дод, дар деҳаи Сарғойи ҷамоати деҳоти Алғаи ноҳияи Лахш 2 хонаи истиқоматӣ қисман зарар диданд. Талафоти ҷонӣ ба қайд гирифта нашудааст. Дар ҷойи ҳодиса Ситоди ноҳиявӣ фаъолият дорад.
Тавре қаблан иттилоъ додем, имрўз дар қаламрави Ҷумҳурии Тоҷикистон дар як дақиқа ду маротиба заминларза ба қайд гирифта шуд.
Мувофиқи маълумоти Маркази зилзиласанҷии Тоҷикистон, маркази заминларза дар километри 265 -уми шимолу шарқӣ аз шаҳри Душанбе дар сарҳади Тоҷикистону Қирғизистон ба қайд гирифта шуд. Дар ҳолати аввал заминҷунбӣ 4-5 балл ва дар ҳолати дуюм 6 баллро ташкил дод.
Дар шаҳри Душанбе қувваи он ба 3 балл баробар буд.