Дар Тоҷикистон лоиҳаи қонуни нав-«Дар бораи сайёҳии дохилӣ» қабул мегардад

ДУШАНБЕ, 15.05.2017/АМИТ «Ховар»/. Дар Тоҷикистон лоиҳаи Қонуни  Ҷумҳурии Тоҷикистон «Дар бораи сайёҳии дохилӣ» қабул карда мешавад. Масъалаи мазкур 15 май дар ҷаласаи Шӯрои палатаи поёнии Парлумони Тоҷикистон, ки таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров доир гардид, баррасӣ шуд.

Раиси кумитаи Маҷлиси намояндагон Лутфия Раҷабова  гуфт, ки лоиҳаи қонуни мазкур дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба рушди сайёҳӣ дар кишвар таҳия гаридааст. Таъкид шуд, ки ҳадафи таҳияи лоиҳаи конуни мазкур фароҳам овардани шароити мусоид ва  муосири ҳуқуқӣ барои рушди иқтисодиёти миллӣ ва инфрасохтори сайёҳӣ, инчунин ҷалби сайёҳони хориҷӣ ба Тоҷикистон мебошад.

Дар таҳияи лоиҳаи Қонуни Ҷумҳурии Тоҷикистон  «Дар бораи сайёҳии дохилӣ» таҷрибаи қонунгузорӣ ва амалии кишварҳои пешрафтаи ҷаҳон дар самти сайёҳӣ, ба монанди Амрико, Хитой, Япония, Ирландия   мавриди таҳлилу омӯзиш қарор дода шудаанд.

Бояд тазаккур дод, ки даромад аз  бахши сайёҳӣ дар сатҳи ҷаҳон баъд аз нефт ва маводи доруворӣ ҷои сеюмро ишғол намуда, 30 %-и  содироти хизматрасониро ташкил медиҳад. Танҳо дар соли 2015 дар миқёси ҷаҳон ташрифи сайёҳон 4 фоиз афзоиш ёфта, ба 1,2 млрд. нафар расид ва  даромади умумии  давлатҳо ба $1,5 трлн. баробар гардид, ки ҳудудан 10 фоизи маҷмӯи маҳсулоти дохилии ҷаҳонро ташкил медиҳад.

Интизор меравад, ки лоиҳаи Қонуни Ҷумҳурии Тоҷикистон «Дар бораи сайёҳии дохилӣ» рӯзҳои наздик аз ҷониби вакилони палатаи  поёнии Парлумони мамлакат қабул гардад.

Дар ҷаласаи Шӯро ҳамзамон масъалаҳо «Оид ба ворид намудани тағйироту илова ба қонунҳои Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ», «Дар бораи ҳаракат дар роҳ» ва «Дар бораи ҳифзи муҳти зист» баррасӣ шуданд.