Гурӯҳи корӣ ҷиҳати таҳияи «Барномаи рушди иҷтимоию иқтисодии шаҳри Душанбе барои давраи то соли 2025» пешниҳоди созандаи сокинони пойтахтро интизор аст

ДУШАНБЕ, 01.05.2017. /АМИТ Ховар/. Тибқи Қарори Раиси шаҳри Душанбе аз 5 апрели соли 2017 «Барномаи рушди иҷтимоию иқтисодии шаҳри Душанбе барои давраи то соли 2025» таҳия гардида истодааст, ки он бо мақсади банақшагирии стратегии рушди соҳаҳои иҷтимоию иқтисодии шаҳри Душанбе, мувофиқасозии мавқею нуқтаи назари мақомоти давлатӣ, сохторҳои тиҷоратӣ ва ташкилотҳои ҷамъиятӣ, ҷалби қисмати фаъоли аҳли ҷамоати шаҳр дар ҳалли масъалаҳои иҷтимоию иқтисодӣ нигаронида шудааст.
Дар ин бора аз Раёсати иттилоотӣ ва робитаҳои хориҷии дастгоҳи Раиси шаҳри Душанбе хабар дода, зикр карданд, ки бо ин мақсад дар Мақомоти иҷоияи ҳокимияти давлатии шаҳри Душанбе Гурӯҳи корӣ таъсис ёфтааст. Барномаи зикршуда дар ҳолати таҳия қарор дорад.
«Бо назардошти фикру мулоҳиза ва таклифҳои созандаи сокинони шаҳр ва ба вуҷуд овардани шароити мусоид ҷиҳати бунёди ҷомеаи шаҳрвандӣ, пешниҳодҳои созанда ва креативии сокинони шаҳрро ба Гурӯҳи корӣ тариқи почтаи электронии barnoma2025@mail.ru ё бо телефони 987 — 96 — 00 — 00 интизорем», -афзуд манбаъ.