Кирмакпарварони Конибодом ба пилласупорӣ шурӯъ намуданд
![](https://khovar.tj/wp-content/uploads/2017/05/pilla-2.jpg)
ДУШАНБЕ, 20.05.2017 /АМИТ Ховар/. Кирмакпарварони шаҳри Конибодом дар вилояти Суғд яке аз аввалинҳо шуда, ба пилласупорӣ шурӯъ намуданд.
Тавре аз Мақомоти иҷроияи ҳокимияти давлатии шаҳри Конибодом ба АМИТ хабар доданд, дар мавсими имсола кирмакпарварони шаҳр парвариши 1920 қуттӣ тухми кирмакро дар 2 ҳазору 858 хоҷагӣ ба роҳ монда буданд. Парвариши кирмак дар ҳудуди ҳамаи 6 ҷамоати деҳот бо риояи қоидаҳои агротехникии парвариши кирмак ба роҳ монда, ҳосили дилхоҳ рӯёнида шуд.
Дар ҷараёни қабули ҳосили аввали пилла раиси шаҳр Ғайбулло Боҳирӣ, масъулони соҳа ва намояндаи ширкати сармоягузори ватанӣ- ҶДММ «Тоҷсилк» Қодир Абдулло иштирок намуданд.
Ба иттилои манбаъ, дар рӯзи аввали қабули пилла ҷамъ аз 25 қуттӣ кирмак 1480 кг пилла супорида шуд, ки ҳосилнокии ҳар қуттӣ ба 59,2 кг баробар аст.