Пан Юнхе бо сафари дурӯза ба Тоҷикистон меояд
![](https://khovar.tj/wp-content/uploads/2017/05/Tadzh-Kitaj.jpg)
ДУШАНБЕ, 12.05.2017 /АМИТ «Ховар»/. Пан Юнхе, раиси комиссия оид ба корҳои хориҷии кумитаи умумичинии Шӯрои халқии сиёсӣ ва машваратии Ҷумҳурии Мардумии Чин 15 май бо ҳайати баландпоя ба Тоҷикистон меояд.
Тибқи иттилои котиби матбуоти Маҷлиси намояндагони Маҷлиси Олии ҶТ Муҳамадато Султонов, Пан Юнхе зимни сафари корӣ ба Душанбе бо Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ва дигар шахсони воломақоми Ҳукумати Ҷумҳурии Тоҷикистон мулоқот менамояд.
Интизор меравад, ки Пан Юнхе ва ҳамроҳонаш ба тамошои Осорхонаи миллӣ, «Кохи Наврӯз», майдони «Дӯстӣ» ва боғи Устод Рӯдакӣ раванд.
Меҳмонон ҳамзамон ба шаҳри Норак ва ноҳияи Ёвон сафар намуда, аз Неругоҳи барқи обии Норак ва корхонаи «Хуаксин Ғаюр Семент» боздид менамоянд.