Пешгирии сӯхтор аз хомӯш намудани он осонтар аст!

ДУШАНБЕ, 13.05.2017. /АМИТ «Ховар»/. Аз тарафи мутахассисони мақомоти назорати давлатии бехатарӣ аз сӯхтори Хадамоти давлатии оташнишонии шаҳри Вахдат дар истироҳатгоҳи Академияи илмҳои Ҷумҳурии Тоҷикистон, ки масоҳати умумии он беш аз 12 гектар мебошад, ва Маркази ҷумҳуриявии барқарорсозии солимии кӯдакони шаҳри Вахдат, ки айни замон дар он беш аз 70 нафар кӯдакон барои барқарорсозии саломатӣ табобат мегиранд, вохӯриҳои муҳими зиддисӯхторӣ гузаронида шуданд.

Дар ин бора аз Хадамоти давлатии оташнишонии шаҳри Ваҳдат хабар доданд.

Ҳадафи ин гуна мулоқот пешгирӣ намудани ҳодисаҳои нохуши сӯхтор ва баланд бардоштани малакаву дониши масъулону кормандони корхонаву муассисаҳои шакли моликияташон гуногун ва шаҳрвандон мебошад.

Кормандони мақомоти мазкур ба масъулон ва кормандону хизматчиёни иншооти номбурда дар хусуси омилу сабабҳои асосии ба амал омадани ҳодисаҳои нохуши сӯхтор ва роҳҳои сари вақт пешгирӣ кардани он маълумот доданд.

Ба иттилои манбаъ, кор дар ин самт аз тарафи мутахассисони мақомоти назорати давлатии бехатарӣ аз сӯхтори Хадамоти давлатии оташнишонии шаҳри Ваҳдат идома дорад.