Савганди ҳарбии 300 нафар сарбозони навдаъватшуда дар арафаи ҷашни ғалаба бар фашизм

ДУШАНБЕ, 09.05.2017. /АМИТ «Ховар» /. Бахшида ба 72-умин солгарди ғалаба дар Ҷанги бузургӣ ватании солҳои 1941-1945 дар Маркази таълимии «Пойтахт»-и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон бо баргузор намудани маросими бошукӯҳи тантанавӣ 300 нафар сарбозони навдаъватшуда савганди ҳарбӣ ёд карданд, — иттилоъ дод ба АМИТ «Ховар» сардори хадамоти матбуоти Қӯшунҳои сарҳадӣ М.Улуғхоҷаев.
Ҳамзамон дар ҳамин маросим ба 140 нафар хатмкунандагони курсҳои кӯтоҳмуддати «прапоршикон» дипломҳо ва рутбаҳои ҳарбии «прапоршик» супорида шуд.
Дар маросими мазкур раиси Кумитаи давлатии амнияти миллии Ҷумҳурии Тоҷикистон генерал-лейтенант Саймумин Ятимов, Фармондеҳи Қӯшунҳои сарҳадии КДАМ ҶТ генерал-лейтенант Раҷабалӣ Раҳмоналӣ, ҳайати фармондеҳии Маркази таълимии «Пойтахт», намояндагони Федератсияи Россия, собиқадорони Ҷанги бузурги ватанӣ, ҷанговарони интернатсионалист, падару модарони сарбозон ва дигар меҳмонон иштирок доштанд.
С. Ятимов раиси КДАМ ҶТ, зимни суханронӣ зикр кард, ки «Маҳз бо шарофати садоқату ҷасорати касбӣ, фидокориву ҷоннисорӣ ва хизматҳои шабонарӯзии сарбозону афсарони Ватан, имрӯз дар ҷомеаи мо сулҳу суббот пойдор гардида, мардум зиндагии осоишта доранд. Мубориза бар зидди ҳамагуна хатарҳои эҳтимолӣ ба хусус терроризми байналмилалӣ, экстремизми сиёсӣ ва дигар зуҳуроти номатлуб аз ҳар як афсару сарбоз омодабошии доимии ҳарбиро тақозо менамояд».
Таъкид карда шуд, ки вазифаи аввалиндараҷаи ҳар як хизматчии ҳарбӣ ин садоқат ба Ватан ва савганди ҳарбӣ мебошад.
Собиқадорони ҷанг, падару модарони сарбозон зимни суханрониҳо ба наваскарон иҷрои хизмати софдилонаро дар ҳифзи марзу буми кишвар орзу намуда, қайд карданд, ки хизмати аскарӣ барои ҳар як ҷавонмард мактаби воқеии ҳаёт мебошад.