Хадамоти гумруки Тоҷикистон дар панҷ моҳ 1 ҳазору 811 ҳолати ҳуқуқвайронкуниро ба қайд гирифтааст

ДУШАНБЕ, 21 .06.2017 /АМИТ «Ховар»/. Таҳлили фаъолияти воҳидҳои сохтории Хадамоти гумруки назди Ҳукумати Ҷумҳурии Тоҷикистон дар самти мубориза бар зидди ҳуқуқвайронкуниҳои гумрукӣ нишон медиҳад, ки дар зарфи панҷ моҳи соли 2017 1 ҳазору 811 ҳолати ҳуқуқвайронкуниҳои гумрукӣ ба қайд гирифта шудааст.

Дар ин бора ба АМИТ «Ховар» аз Маркази матбуоти Хадамоти гумруки назди Ҳукумати Ҷумҳурии Тоҷикистон хабар доданд.

Аз ҳисоби умумии қонуншиканиҳои ба қайд гирифташуда дар 43 ҳолат парвандаҳои ҷиноятӣ оғоз шудаанд, ки 4 ҳолати он ба қочоқ ва гардиши ғайриқонунии маводи нашъаовар, 27 ҳолат ба ҷиноятҳои қочоқи молу воситаҳои нақлиёт ва 12 ҳолати дигари ҷиноятҳо марбут ба фаъолияти гумрукӣ мебошанд.

Аз онҳо 18 парванда ба Раёсати минтақавии гумрукӣ дар вилояти Суғд, 8 парванда ба Раёсати минтақавии гумрукӣ дар шаҳри Душанбе, 2 парванда ба Раёсати минтақавии гумрукӣ дар вилояти Хатлон ва 15 парванда ба Раёсати ташкили мубориза бар зидди ҳуқуқваронкуниҳои гумрукии Хадамоти гумрук рост меояд.

Дар ин давра 4 ҳолати қочоқ ва гардиши ғайриқонунии маводи нашъаовар ба миқдори умумии 24 килограмму 20 грамм ба қайд гирифта шудааст, ки 58,3 грамм афюн, 20 кг 56 грамм ҳашиш ва 3 кг 905 грамм моддаи психотропии  метамфетамин ташкил менамояд.

Нисбат ба боқимонда 1 ҳазору 768 ҳолати дигар парвандаҳои ҳуқуқвайронкунии маъмурӣ тартиб дода шуда, 1 ҳазору 521 нафар шахсони ҳуқуқию воқеӣ ба ҷавобгарии маъмурӣ кашида шудаанд. Аз ин миқдор 1 ҳазору 495 адад парвандаҳо баррасӣ ва ба маблағи 2 миллиону 414 ҳазору 550 сомонӣ ҷарима рӯёнида шудааст.

Барои баррасӣ 1 ҳазору 48 адад парвандаҳо ба мақомоти судӣ ирсол гардида, ба маблағи 2 миллиону 980 ҳазору 567 сомонӣ пардохтҳои гумрукӣ ситонида шуд ва ба маблағи 681 ҳазору 588 сомонӣ молҳо мусодира карда шудаанд.