Истифодаи телефонҳои мобилӣ ва интернет – яке аз омилҳои асосии шомилшавӣ ба ҳизбу ҳаракатҳои террористию экстремистӣ

ДУШАНБЕ, 17.06.2017 /АМИТ «Ховар»/. Бо мақсади пешгирии ҷавонон аз шомилшавӣ ба ҳизбу ҳаракатҳои террористию экстремистӣ, тарбияи онҳо дар рӯҳияи худогоҳиву худшиносӣ, пешгирии хурофотпарастӣ, таҳкими ваҳдат ва сулҳу субот дар ҷомеа гурӯҳи кории Дастгоҳи иҷроияи Президени Ҷумҳурии Тоҷикистон ва Раёсати Вазорати корҳои дохилӣ дар вилояти Хатлон дар ноҳияи Шаҳритуз вохӯрӣ доир намуданд.

Тавре ба хабарнигори АМИТ «Ховар» аз Вазорати корҳои дохилӣ хабар доданд, муовини сардори РВКД дар вилояти Хатлон Ҷумахон Назарзода оид ба мафҳум ва моҳият, омилҳо ва оқибатҳои шомилшавии ҷавонон ба ҳизбу ҳаракатҳои террористиву экстремистӣ сухан гуфта, зикр кард, ки яке аз сабабҳои шомилшавӣ ба ин гурӯҳҳо истифодаи телефонҳои мобилӣ ва интернет мебошад. «Имрӯз мо, падару модарон бояд бо ин гуна зуҳуроти нангин мубориза барем ва фарзандони худро дар рӯҳияи худогоҳии миллӣ ва худшиносӣ тарбия намоем»,- афзуд ӯ.

Зикр гардид, ки аҳли ҷомеа бояд ҳамкориро бо мақомоти ҳифзи ҳуқуқ пурзӯр намоянд ва нисбат ба ин зуҳуроти номатлуб оштинопазир бошанд.

Дар вохурӣ Раиси ноҳияи Шаҳритуз Рамазон Оймаҳмадзода, сардори Шуъбаи ВКД дар ноҳияи Шаҳритуз Валихон Ҳамдамзода, шоири шинохта Хайрандеш, фаъолони ноҳия, падару модарон, ҷавонон ва имомхатибон андешаҳояшонро иброз намуданд.