Петер Сиярто: «Венгрия омода аст барои рушди иқтисоди Тоҷикистон мусоидати фаъол намояд»

ДУШАНБЕ, 29.06.2017 /АМИТ «Ховар»/. Дурнамо ва таҳкими  ҳамкории мутақобилан  судманди Тоҷикистону Венгрия дар меҳвари мулоқоти Раиси Маҷлиси намояндагони Маҷлиси Олии Ҷумҳурии Тоҷикистон  Шукурҷон Зуҳуров  ва Вазири корҳои хориҷии Ҷумҳурии Венгрия  Петер Сийярто қарор дошт.

Дар мулоқот барои рушду тавсеаи бештари ҳамкории байнидавлатӣ  ҳавасмандӣ зоҳир гардида, таъкид шуд, ки дар давоми барқароршавии муносибатҳои дипломатии Тоҷикистону Венгрия   бо талошҳои муштарак ҳамгироии байнидавлатӣ дар соҳаҳои сиёсӣ, иқтисодӣ ва иҷтимоӣ бемайлон густариш ёфтанд. Инчунин мусоҳибон доир ба рушди ҳамкории иқтисодию тиҷоратӣ ва дарёфти роҳу усулҳои беҳтарсозии нишондиҳандаҳои гардиши савдои байнидавлатӣ ибрози назар намуданд.

Шукурҷон Зуҳуров бо ёдоварӣ аз мавқеи Венгрия дар Аврупои Шарқӣ ва таърихи робитаҳои қаблии ду кишвар изҳори қаноатмандӣ намуда, гуфт: «Мо Венгрияро дар робитаҳои байналмилалии худ шарики боэътимод медонем ва барои таҳкими пояҳои ҳамкории мутақобилан судманд бо он саъю талош дорем». Инчунин доир ба тавсеаи ҳамкории ду  кишвар дар бахшҳои тиҷорату иқтисод, тандурустӣ, маориф, фарҳанг, иҷтимоӣ тавассути бунёди заминаи мусоиди ҳуқуқиву қарордодӣ табодули назар намуданд. Шукурҷон Зуҳуров  хостори таъсиси гурӯҳи  дӯстӣ миёни парлумонҳои Тоҷикистону Венгрия  гардид. «Бо таъсиси гурӯҳҳои дустӣ мо метавонем қадамҳои ҷиддитар дар муносиботи байнипарлумонии Тоҷикистон ва Венгрия бардорем»,-такид кард Раиси Маҷлиси намояндагон.

Вазири корҳои хориҷии  Венгрия Петер Сийярто  гуфт,  ки Венгрия ба густариши ҳамкорӣ бо Тоҷикистон ба манзури нақши муҳими он дар минтақаи Осиёи Марказӣ манфиатдор аст. Мавсуф таъкид кард, ки Венгрия омода аст барои рушди иқтисоди Тоҷикистон тавассути татбиқи лоиҳаҳои муштараки судманд мусоидати фаъол намояд.