Саёҳати мактабиёни Ҳисор ба Данғара: боздид аз синфхонае, ки Пешвои миллат дар он таҳсил намудаанд

Июнь 30, 2017 10:59

ДУШАНБЕ, 30.06.2017 /АМИТ «Ховар»/. Тибқи нақша – чорабиниҳо хонандагони Муассисаи таълимии «Нури Ирфон»- и шаҳри Ҳисор зуд- зуд ба сайри ҷойҳои таърихӣ ва хушманзараи диёр  мебароянд. Ин навбат саёҳати шогирдон ба ноҳияи Данғара  иттифоқ афтод.

— Мо тасмим гирифтем, ки дар арафаи ҷашни 20- солагии Рӯзи Ваҳдати миллӣ аз муассисаи таҳсилоти миёнаи умумии №7-и ноҳияи Данғара, аз мактабе, ки дар он Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҳсил кардаанд, дидан намоем, — гуфт сарвари муассиса Мавҷуда Ҳакимова. — Зеро дар бораи Пешвои миллат бисёр шунидаему наворҳои зиёдеро тамошо кардаем. Дар соатҳои тарбиявӣ ҳаёт ва фаъолияти абармарди миллатро меомӯзем. Аммо дар дили хонандагон хоҳиш пайдо шуд, ки бо мактаб, шароиту муҳити таҳсил ва фазои дабистони таърихӣ, ки  фарзанди фарзонаи миллатро ба камол расондааст, шинос шаванд. Тай намудани роҳи ҳамвор, тамошои ҷойҳои хушманзара, иншооти азиму бузурги роҳи Ҳисор — Душанбе, Душанбе – Данғара хеле гуворо буд. Ронанда аз тариқи баландгӯяк мусофирони хурдсолро ба мавзеъҳои дилрабо ва иншооти таърихӣ шинос мекард.

Дар пайдо кардани муассисаи таҳсилоти миёнаи умумии №7 мушкилӣ накашидем. Баробари вориди таълимгоҳ шудан худро дар гулистони хушбоду ҳаво эҳсос намудем. Аз ду тарафи роҳрав гулу себарга, дарахтони мевадиҳанда ва сояафкан қомат афрохта буданд. Истиқболи гарми маъмурият ва омӯзгорони таълимгоҳ моро хуш омад.

Боздид аз долони мактаб оғоз ёфт, ки айни замон, бо мақсади  тарбияи насли наврас дар рӯҳияи ватандӯстӣ, ба осорхона табдил ёфтааст. Мутасаддӣ ва роҳбари он, омӯзгори варзида Йигит Қурбонов ҳар як сурат, китобу маҷалла, ҳуҷҷату маълумоти гирдомадаро шарҳу эзоҳ дод. Шунидани қиссаву ҳикоятҳои аҷиб, дидани нигораву ангораҳои осорхона, синфхонаву таҷҳизот ҳаяҷонбахшу гуворо буд.

— Дар ин синфхона Пешвои миллат Эмомалӣ Раҳмон дарс хондаанд, — гӯён моро ба синфхонаи хеле барҳаво ворид намуданд. Хушбахтии миллати тоҷик аз ин даргоҳ сарчашма  мегирад, — идома дод Й. Қурбонов.

Дар синфхона мизе ҳаст, ки  Пешвои миллат овони мактабхонӣ паси он нишастаанд. Бо журнали синф, дастовардҳои айёми мактабхонӣ шинос шуда, либосҳои давраи хизмати ҳарбиашонро дидем.

«Ҳамду сано ба модаре, ки чунин абармард, фарзанди фарзонаи миллатро ба дунё оварда, ба камол расонд. Аҳсан ба омӯзгороне, ки роҳи чунин шогирдонро равшану  мунаввар менамоянд!» — изҳор доштанд омӯзгорону шогирдон пас аз тамошои осорхона.

Дар бозгашт чойхонаи хуштарҳи «Хуррамшаҳр»- ро тамошо кардем. Роҳбари Муассисаи таълимии «Нури Ирфон» Мавҷуда Ҳакимова аз хизматҳои Сарвари давлат Эмомалӣ Раҳмон дар таҳкими Ваҳдати миллӣ, таърихи бунёди нақбҳои «Истиқлол» ва «Хатлон», неругоҳҳои барқи обӣ маълумоти ҷолиб ироа намуд. Дар маҷмӯъ, сафар барои хонандагон дарси хуби тарбиявӣ гардид.

 Мушаррафа ЗИЁЕВА,

рӯзноманигор

(Бознашр аз рӯзномаи «Садои мардум»)

Июнь 30, 2017 10:59

Хабарҳои дигари ин бахш

Имрӯз дар ноҳияҳои алоҳидаи Тоҷикистон борони кӯтоҳмуддат меборад
«ПАРАСТУ». Дар Бӯстон басти аввали истироҳатгоҳи шаҳрӣ оғоз гардид
Дар ноҳияи Ховалинг дар зиёда аз 600 гектар кишти картошка гузаронида мешавад
Имрӯз дар водиҳои Тоҷикистон ҳаво то 38 дараҷа гарм мешавад
Дар Донишгоҳи байналмилалии сайёҳӣ ва соҳибкории Тоҷикистон бахшида ба Даҳсолаи байналмилалии амал оид ба илмҳои яхшиносӣ ҳамоиш баргузор мешавад
Тавсия: барои алоқа дар Узбекистон маблағ камтар сарф мекунем
Дар соҳили Сирдарё барои истироҳату фароғат шароити хуб фароҳам оварда шудааст
Президенти Тоҷикистон ҳамоиши сатҳи олӣ — муаррифии Даҳсолаи байналмилалии барои илмҳои яхшиносӣ (криосферӣ)-ро ифтитоҳ намуданд
Дар Хуҷанд Мусобиқаи ҷумҳуриявӣ оид ба ҷудо байни наврасон ҷамъбаст гардид
Имрӯз дар шаҳри Душанбе ҳаво то 35 дараҷа гарм мешавад
ҚУРБИ АСЪОР: дар Тоҷикистон 1 рубли русӣ аз 0.1247 то 0.1240 сомонӣ муқаррар шудааст
Кишоварзони ноҳияи Восеъ дар гармхона бо усулҳои муосир маҳсулот парвариш мекунанд