21 нафар лижарон дар мавзеи «Хоҷа Оби Гарм» ба тамрин сафарбар гардидаанд

ДУШАНБЕ, 27.07.2017 /АМИТ «Ховар»/. Дар ин рӯзҳо 21 нафар варзишгарон аз намуди лижаронӣ дар мавзеи  «Хоҷа Оби Гарм»-и ноҳияи Варзоб зери сарпарастии Ассотсиатсияи миллии намудҳои зимистонаи варзиши Тоҷикистон ба бозиҳои олимпӣ омодагӣ дида истодаанд. Дар ин бора ба хабарнигори АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон иттилоъ доданд.

Ба иттилои манбаъ, Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода 26 июли соли равон ба мавзеи «Хоҷа Оби Гарм»-и ноҳияи Варзоб сафари корӣ анҷом дод. Зимни сафари корӣ раиси Кумита бо ҷараёни омодагии лижаронҳо ва шароити тамрини онҳо аз наздик шинос гардид. Дар ҷараёни шиносоӣ бо вазъи тамрин ва омодашавии лижаронон Аҳтам Абдуллозода аз дастгириҳову ғамхориҳои пайвастаи давлату Ҳукумати Тоҷикистон, хусусан Пешвои миллат муҳтарам Эмомалӣ Раҳмон нисбат ба варзишгарон ёдовар гардида, таъкид намуд, ки бо шарофати истиқлолияти давлатӣ ва сиёсати дурандешонаи роҳбарияти олии мамлакат имрӯз варзишгарони мо дар мусобиқаҳову олимпиадаҳои сатҳи баланди ҷаҳонӣ иштирок намуда, ба муваффақиятҳо ноил мегарданд.

Мавриди зикр аст, ки аз ҷониби Ассотсиатсияи миллии намудҳои зимистонаи варзиши Тоҷикистон барои варзишгарон дар мавзеи «Хоҷа Оби Гарм» пайваста ҷамъомадҳои машқию таълимӣ  ташкил карда мешаванд. Таҳти сарпарастии ин ташкилот варзишгарони ин намуд аллакай дар чандин мусобиқаҳои сатҳи баланди варзишӣ иштирок намуда, ҷойҳои намоёнро ишғол кардаанд, ки қобили ифтихор аст.

Ёдовар мешавем, ки бозиҳои зимистонаи навбатии олимпӣ соли 2018 дар давлати Кореяи Ҷанубӣ баргузор шуда, варзишгарони тоҷик низ дар он иштирок мекунанд.