ДУШАНБЕ, 11.07.2017 /АМИТ «Ховар»/. Дар шоҳроҳи Хуҷанд-Душанбе гумрукчиёни тоҷик зимни гузаронидани  чорабиниҳои оперативӣ — ҷустуҷӯӣ нақлиёти тамғаи «VOLVO F – 12 – 380 — 4х2» рақами қайди давлатиаш E 956 КН 159 бо ядакаш AН 518 159, бо 32 номгӯи молҳои истифодашуда ва як адад трактори «Беларус 82.1» боздошт намуданд.

Тавре аз Хадамоти гумруки назди Ҳукумати ҷумҳурӣ  ба АМИТ «Ховар» иттилоъ доданд, ин молҳо ба шаҳрванди 45-солаи Ҷумҳурии Тоҷикистон, сокини вилояти Хатлон  Х. Н., мансуб буда, номбурда молҳоро аз шаҳри Перми Россия тавассути Қирғизистон бо роҳи  қочоқ ба Ҷумҳурии Тоҷикистон ворид намудааст. Арзиши молҳои тариқи қочоқ вориднамудаи шаҳрванд Х.Н., беш аз 280 ҳазор сомониро ташкил медиҳад.

Сарчашма иттилоъ медиҳад, ки нисбат ба ин шаҳрванд  бо моддаи 289 қисми 2 — и Кодекси ҷиноятии Ҷумҳурии Тоҷикистон аз тарафи Прокуратураи генералии Ҷумҳурии Тоҷикистон парвандаи ҷиноятӣ  оғоз карда шудааст.