Нишастҳои матбуотии Вазорати нақлиёт, Роҳи оҳани Тоҷикистон, «Тоҷикаэронавигатсия» ва «Тоҷик Эйр» рӯзи душанбе баргузор мешаванд

ДУШАНБЕ, 29.07.2017 /АМИТ «Ховар»/. Рӯзи душанбе, 31 июли соли 2017 нишастҳои матбуотии Вазорати нақлиёти Ҷумҳурии Тоҷикистон,  Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Кумитаи забон ва истилоҳоти назди Ҳукумати Ҷумҳурии Тоҷикистон оид ба натиҷаҳои фаъолияти нимсолаи аввали соли равон гузаронида мешаванд.

Нишасти матбуотии Кумитаи давлатии сармоягузорӣ ва идораи амволи давлатии Ҷумҳурии Тоҷикистон  соати 9:00 дар маҷлисгоҳи Кумитаи давлатии сармоягузорӣ ва идораи амволи давлатӣ (ш. Душанбе, кӯчаи Шоҳтемур, 27) таъйин шудааст.

Роҳбарияти Кумитаи забон ва истилоҳоти назди Ҳукумати Ҷумҳурии Тоҷикистон соати 15:00 дар толори Маркази матбуоти ҷумҳуриявии «Ховар» (ш. Душанбе, хиёбони Рӯдакӣ, 40) бо намояндагони воситаҳои ахбори омма мулоқот мекунанд.

Вазорати нақлиёти Ҷумҳурии Тоҷикистон намояндагони воситаҳои  ахбори оммаро ҷиҳати иштирок дар нишасти матбуотӣ оид ба ҷамъбасти нимсолаи аввали соли равон 31 июл, соати 10:00 ба толори вазорати мазкур даъват кардааст. Мавриди зикр аст, ки дар нишасти матбуотии Вазорати нақлиёт роҳбарияти КВД «Роҳи оҳани Тоҷикистон», КВД «Тоҷикаэронавигатсия», ҶСК «Тоҷик Эйр» иштирок мекунанд ва ба саволҳои журналистон ҷавоб мегӯянд.

Хотиррасон мешавем, ки мутобиқи Амри Президенти Ҷумҳурии Тоҷикистон аз 15 сентябри соли 2011 вазорату идораҳо ва ташкилоту муассисаҳои мамлакат баъд аз ҷамъбасти натиҷаҳои фаъолияти шашмоҳа ва солона ҳар сол ду маротиба нишастҳои матбуотӣ баргузор карда, ба саволҳои намояндагони ВАО   посух медиҳанд.