Вохӯрии сеҷонибаи сарони кишварҳои Тоҷикистон, Покистон ва Афғонистон дар Душанбе

ДУШАНБЕ, 04.07.2017 /АМИТ «Ховар»/. Бо даъвати Президенти Ҷумҳурии Тоҷикистон Эмомалӣ Раҳмон 6 июли соли 2017 дар шаҳри Душанбе ҷаласаи сеҷонибаи сарони давлатҳои Тоҷикистон, Афғонистон ва Покистон баргузор хоҳад шуд.

Дар ин бора ба АМИТ «Ховар» дар Вазорати корҳои хориҷии Тоҷикисон хабар доданд.

Дар чаҳорчӯби вохӯрӣ доираи васеи масоили ҳамкорӣ миёни се кишвар дар соҳаҳои сиёсат, иқтисод ва амният баррасӣ хоҳанд шуд.

Зимни баррасии масъалаҳои иқтисодӣ ҷонибҳо ба масъалаҳои марбут ба савдо ва сармоягузорӣ, энергетика, зерсохтори нақлиётӣ ва таҳкими равобит миёни доираи соҳибкорони се кишвар таваҷҷуҳи хоса хоҳанд намуд. Ҳамчунин масъалаҳои дастгирии минбаъдаи Ҳукумати Ҷумҳурии Афғонистон дар ростои таъмини сулҳ ва рушди иқтисодиву иҷтимоии кишвар, инчунин муборизаи босамар алайҳи хатарҳои минтақавӣ ва байналмилалии амниятӣ дар маркази диққати ҷонибҳо қарор ҳоҳанд гирифт.

Интизор меравад, ки ҷонибҳо аз рӯи натиҷаи мулоқоти Душанбе изҳороти муштараки сарони се кишвар, ки ба мушорикати фарогир, эъҷоди механизмҳои нави ҳамкорӣ дар самтҳои калидии ҳамкоҳорӣ  ва такони тоза бахшидан ба равандҳои минтақавӣ равона гардидааст, қабул хоҳанд кард.