Як миллиард аҳолии ҷаҳон аз норасоии ғизо азият мекашад

Июль 21, 2017 16:44

ДУШАНБЕ, 21.07.2017 /АМИТ «Ховар»/. «Дар ҷаҳон 1 миллиард аҳолӣ аз норасоии ғизо  ва 2 миллиард аз норасоии микроэлементҳо азият мекашанд». Ин матлаб зимни  ҷаласае, ки имрӯз дар Душанбе дар мавзӯи тавсеаи ҳамкорӣ ва ташкили Бизнес-  шабакаи САН (Scaling Up Nutrition Business Network) дар рушди шарикии давлатӣ бо бахши хусусии Ҷумҳурии Тоҷикистон доир гардид, зикр шуд.

Дар ҷаласа намояндагони Парлумони Тоҷикистон, вазорату идораҳои марбута,   созмонҳои байналмилалӣ, соҳибкорони ватанӣ —  ғизоистеҳсолкунандагон  иштирок намуда, доир ба  ғанигардонии маҳсулоти ғизоӣ ва таъмини аҳолии кишвар бо ғизои хушсифат  ибрози назар карданд.

Муовини раиси Палатаи савдо ва саноати Ҷумҳурии Тоҷикистон Манзура Рустамова гуфт, ки Ҳукумати Ҷумҳурии Тоҷикистон дар мавриди ғизонокии  маҳсулоти хӯрока ва таъмини аҳолии кишвар бо ғизои хушсифат тадбирҳои  зарурӣ меандешад. Мавсуф афзуд, ки ҳадаф аз гузаронидани ҷаласа дар Душанбе бо ҳузури намояндагони вазорату идораҳо ва бахши хусусии кишвар –ғизоворидкунандагон ва истеҳсолкунандагони ватанӣ ташкили платформаест, ки он метавонад дар оянда барои ҳалли мушкилоти вобаста ба таъмини аҳолии кишвар бо маҳсулоти серғизо мусоидат намояд. Инчунин дар ҷаласа  вакили Маҷлиси намояндагон Гулбаҳор Ашӯрзода, муовини аввали Вазири тандурустӣ ва ҳифзи иҷтимоии аҳолии ҷумҳурӣ Саида Умарзода ва дигар намояндагони вазорату идораҳои ҷумҳурӣ доир ба таъмини амнияти озуқавории кишвар, баланд бардоштани иқтидори ғизоистеҳсолкуннадагони ватанӣ ва ғизоворидкунандагон-бахши хусусӣ,  таъмини синни осебпазири ҷомеа-кӯдакони то синни 5-сола ва занони қобили таваллуд бо маҳсулоти серғизо ибрози назар карданд.

Таъкид шуд, ки  таъмини амнияти озуқаворӣ ҳамеша дар маркази таваҷҷуҳи Ҳукумати Ҷумҳурии Тоҷикистон қарор дошта, он дар Стратегияи рушди Ҷумҳурии Тоҷикистон барои то соли 2030 қайд гардидааст. Инчунин интизор меравад, ки дар оянда аз ҷониби Ҳукумати Ҷумҳурии Тоҷикистон Стратегияи ғизои мактаббачагон тасдиқ карда шавад. Ҳамзамон бо мақсади таъмини ҳарчи бештари аҳолии кишвар  бо ғизои солим дар бархе аз санадҳои қонунгузории кишвар, хусусан ба Кодекси тандурустии Ҷумҳурии Тоҷикистон тағйироту иловаҳо ворид карда хоҳанд шуд.

Ба андешаи сардори Раёсати  ташкили хизматрасониҳои тиббӣ ба модарону кӯдакон ва танзими оилаи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Шералӣ Раҳматуллоев,  масъалаи бехатарии озуқа ва ғизо яке аз масъалаҳои мубрам на танҳо дар   кишвари мо,  балки дар ҷаҳон мебошад. Мавсуф мегӯяд, ки дар ин  самт Ҳукумати Ҷумҳурии Тоҷикистон  тадбирҳои  самарабахш меандешад.  Дар ин росто,  баҳри беҳтар кардани сатҳи ғизонокии маҳсулоти озуқа    дар байни  аҳолии синни осебпазири кишвар, хусусан кӯдакони синни то 5-сола ва занони қобили таваллуд  (то 49- сола)   дар солҳои 2009-2012 аз ҷониби  созмонҳои байналмилалӣ таҳқиқотҳои тиббӣ-демографӣ гузаронида шуд. Натиҷаи тадқиқотҳо нишон доданд, ки  дар сатҳи ғизогирӣ  дар байни аҳолии синни осебпазир –кӯдакони то  5-сола ва занони қобили таваллуд мушкилот вуҷуд дорад, ки он боиси инкишоф наёфтани кӯдакони синни то 5- сола ва ба бемории камхунӣ мубтало гардидани занони қобили таваллуд шудааст. Таъкид гардид, ки барои ҳалли мушкилоти вобаста ба таъмини бехатарии озуқа Ҳукумати кишвар  дар  вилояти Хатлон ду барномаро  доир ба  норасоии микроэлементҳо дар байни кӯдакони то синни  5 –сола  ва ҷилавгирӣ аз камхунӣ дар байни занони қобили таваллудро татбиқ менамояд.

Июль 21, 2017 16:44

Хабарҳои дигари ин бахш

50 ҳазор аҳолии ноҳияи Абдураҳмони Ҷомӣ бо оби тозаю безарари нӯшокӣ таъмин мегарданд
Ба Маркази омӯзиши пиряхҳои Академияи миллии илмҳои Тоҷикистон таҷҳизоти нави озмоишӣ дастрас карда шуд
Имрӯз дар шаҳри Душанбе ҳаво то 24 дараҷа гарм мешавад
Филми ҳунарии «Моҳӣ дар шаст» дар кинофестивали байналмилалии «Шилингел» дар Олмон намоиш дода шуд
Тоҷикистон мизбони ҷаласаи Шурои сарони кишварҳои аъзои Иттиҳоди Давлатҳои Мустақил мегардад
Имрӯз дар Тоҷикистон ҳаво то 27 дараҷа гарм мешавад
«КИТОБХОНА — КОХИ МАЪРИФАТ». Дар шаҳри Кӯлоб ҳамоиши дӯстдорони китоб доир шуд
Дар шаҳри Панҷакент пойгоҳҳои обкашӣ барқарор карда мешаванд
Доир ба нақши забони давлатӣ дар таҳкими худшиносӣ ва ҳувияти миллӣ ҳамоиш баргузор гардид
Рӯзи забони давлатӣ дар Суди Олии иқтисодӣ ботантана таҷлил карда шуд
Кишоварзони шаҳри Конибодом беш аз 12 ҳазор тонна пахта ҷамъоварӣ менамоянд
Имрӯз дар водиҳо ҳаво то 27 дараҷа гарм мешавад