Агентии обуҳавошиносии Тоҷикистон: Аз 11 то 13 август дар кишвар вазидани боди шадид ва чангу ғубор пешгӯӣ мешавад

ДУШАНБЕ, 09.08.2017 /АМИТ «Ховар»/. Шурӯъ аз 10 август дар кишвар вазиши боди сахт ва чангу ғубор пешгӯӣ карда мешавад. Дар ин бора аз Агентии обуҳавошиносии Тоҷикистон хабар доданд.

Бар асоси пешгӯии ин марказ, чангу ғубор асосан дар ҷануб ва ноҳияҳои тобеи ҷумҳурӣ мушоҳида карда мешавад. Ин гуна вазъи боду ҳаво ду рӯз идома ёфта, баъд аз он дар минтақаҳои кишвар боридани борон дар назар дошта шудааст. Дар ин муддат ҳарорати ҳаво 1-2 дараҷа паст хоҳад шуд.

Дар робита ба ин Агентии обуҳавошиносӣ ба диққати сокинони кишвар ва нафароне, ки аз бемории дилу рагҳо ва узвҳои роҳи нафас азият мекашанд, мерасонад, ки аз 11 то 13 август то ҳадди имкон аз хонаҳои худ берун набароянд.

13 август ҳаво ба ҳолати муқаррарии худ бармегардад.