Дар Душанбе аввалин ҷаласаи гурӯҳи корӣ оид ба омодагӣ ба Бозиҳои тобистонаи олимпии Токио-2020 доир гардид

ДУШАНБЕ, 3.08.2017. /АМИТ «Ховар»/. Имрӯз дар шаҳри Душанбе аввалин ҷаласаи гурӯҳи корӣ оид ба омодагӣ ба Бозиҳои тобистонаи олимпии Токио-2020 баргузор шуд. Ризо Назарзода, муовини аввали Раиси Кумитаи кор бо ҷавонон ва варзиш — роҳбари гурӯҳи корӣ, Дилшод Назаров – муовини раиси Кумитаи кор бо ҷавонон ва варзиш- муовини роҳбари гурӯҳи корӣ таъйин шуданд. Ба ҳайати гурӯҳи корӣ намояндагони Кумитаи миллии олимпии Ҷумҳурии Тоҷикистон, федератсияҳои варзишӣ ва мутахассисони соҳа ворид гардидаанд.
Ба иттилои Кумитаи миллии олимпӣ, гурӯҳи корӣ бо фармоиши раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз 1 августи соли 2017 бо мақсади омодагӣ ба Бозиҳои тобистонаи олимпии Токио-2020 таъсис ёфт.
Дар ҷаласа зикр шуд, ки гурӯҳи корӣ бо мақсади таъсис додани кумитаи тадорукоти омодагӣ ба Бозиҳои олимпии Токио-2020  созмон дода шудааст. Гурӯҳ тибқи нақшаи корӣ фаъолият намуда, варзишгарони беҳтаринро интихоб ва дар ҳамкорӣ бо Кумитаи кор бо ҷавонон ва варзиш, Кумитаи миллии олимпии Ҷумҳурии Тоҷикистон ва федератсияву мактабҳои варзишӣ дар омодагии онҳо ба Олимпиадаи соли 2020 мусоидат мекунад.
Ризо Назарзода зикр кард, ки «баъд аз медали тиллои Дилшод Назаров дар Олимпиадаи Рио-2016 масъулияти мо ва варзишгарони мо бештар шудааст. Мо бояд дар олимпиадаҳои минбаъда Тоҷикистонро дар ҳамин сатҳ нигоҳ дорем».
Муҳаммадшо Абдуллоев, Котиби генералии Кумитаи миллии олимпии Ҷумҳурии Тоҷикистон барномаҳои дастгирии молиявии варзишгаронро аз ҷониби Кумитаи байналмилалии олимпӣ муаррифӣ кард. Зикр шуд, ки аз ҷумла барои омодагии варзишгарон ба Бозиҳои тобистонаи олимпии соли 2020 барномаи дастгирии молиявии варзишгарон, барномаи қитъавӣ барои варзишгарон, барномаҳои давраҳои омӯзишӣ барои доварону мураббиён омода  шудаанд. «Кумитаи иҷроияи Кумитаи миллии олимпии Ҷумҳурии Тоҷикистон 17 варзишгари беҳтарини ҷумҳуриро аз рӯи намудҳои гуногуни варзиш интихоб ва барои дарёфти дастгирии молиявии КБО пешниҳод кард. Дар сурати тасдиқ шудани рӯйхат аз ҷониби КБО 17 варзишгари мо аз моҳи сентябри соли 2017 то сентябри соли 2020 ҷиҳати омодагӣ ба Олимпиадаи Токио-2020 аз дастгирии молиявӣ бархурдор мешаванд», — гуфт М. Абдуллоев.