Истам Шарифов ва Анастасия Турсунова ғолибони Мусобиқаи байналмилалӣ оид ба теннис гардиданд

ДУШАНБЕ, 28.08.2017. /АМИТ «Ховар»/. Аз 23 то 27 августи соли равон дар шаҳри Душанбе Мусобиқаи байналмилалӣ оид ба теннис байни наврасон барои дарёфти Ҷоми Президенти Ҷумҳурии Тоҷикистон доир гардид.

Бино ба иттилои сардовари мусобиқаи мазкур Абдурасул Муҳиддинов, дар мусобиқа наврасон аз Тоҷикистон, Қазоқистон, Қирғизистон, Ӯзбекистон, Россия, Украина, Ҷумҳурии Исломии Афғонистон ва Туркия иштирок намуданд.

Ба иттилои манбаъ, дар мусобиқа байни писарон ҷои аввалро Истам Шарифов аз Ҷумҳурии Тоҷикистон, ҷойи дуюмро Хушбахт Каримов аз Тоҷикистон ва ҷойи сеюмро Саид Акбаров аз Ҷумҳурии Ӯзбекистон сазовор гардиданд.
Миёни духтарон Анастасия Турсунова аз Ҷумҳурии Тоҷикистон ба гирифтани мақоми аввали мусобиқа сарфароз гардид. Ҷойи дуюмро  Наргис Яҳёева ва ҷойи сеюмро Камила Муллоева сазовор гардиданд.

Ба  ғолибони ҷои аввал (духтарон ва писарон)-и мусобиқаи мазкур   7000 сомонӣ, барои ҷои дуюм 5600 сомонӣ, барои ҷои сеюм 3500 сомонӣ,  барои ҷои якум, дуюм ва сеюми ҷуфти духтарон ва  писарон мутаносибан 3500, 2800 ва 1750 сомонӣ  мукофот дода шуд.

Бояд гуфт, ки мусобиқаи мазкур дар «Корти тенниси тобистона»-и КВД «Роҳи оҳани Тоҷикистон» баргузор гардида, он ба рушди ин намуди варзиш дар ҷумҳурӣ ва тарғиби тарзи ҳаёти солим мусоидат менамояд.