ВАРЗИШ – ГАРАВИ САЛОМАТӢ! Ворисони Сино мусобиқоти варзиширо ҷамъбаст карданд

ДУШАНБЕ, 16.08.2017 /АМИТ «Ховар»/. Дирӯз дар шаҳри Душанбе бо ташаббуси Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  мусобиқоти варзишӣ бахшида ба зодрӯзи олим, файласуф ва ҳакими тоҷик Абӯалӣ ибни Сино ва  Иди касбии кормандони тибби Ҷумҳурии Тоҷикистон, ки ҳамасола  18 август таҷлил мегардад, ҷамъбаст гардиданд.  Дар ин бора аз   Вазорати тандурустӣ  ва ҳифзи иҷтимоии аҳолӣ  хабар доданд.

Бино ба иттилои манбаъ,   мусобиқот миёни кормандони муассисаҳои тандурустӣ ва ҳифзи иҷтимоии аҳолӣ  сурат гирифтанд.  Мусобиқаҳои мазкур,  аз қабили мусобиқаи ёздаҳуми футболи хурд, мусобиқаи панҷуми волейбол байни дастаҳои мардонаву занона, мусобиқаи панҷуми тенниси рӯимизӣ   бо мақсади тарғиби тарзи ҳаёти солим  ташкил гардиданд.

Дар маросими ҷамъбасти мусобиқот Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдулозода, сардорони муассисаву идораҳои Вазорати тандурустӣ ва ҳифзи иҷтимоии аҳолӣ ва кормандони ин ниҳод иштирок намуданд.

Зикр шуд, ки солимии ҷомеа солимии давлат буда, варзиш яке аз воситаҳои беҳтарини нигаҳдошти тандурустӣ маҳсуб мешавад.