«АФҒОНИСТОН: ЧОЛИШҲО ВА ТАҲДИДҲО”. Дар Душанбе китоби нави муҳаққиқи тоҷик ба нашр расид

ДУШАНБЕ, 06.09.2017 /АМИТ «Ховар»/. Китоби муҳаққиқ Саймуддин Мирзоев таҳти унвони «Афғонистон: чолиш ва таҳдидҳо» (“Афганистан: вызовы и угрозы») тавассути нашриёти «Ирфон»   бо забони русӣ ба нашр расид.

Тавре аз Институти омӯзиши масъалаҳои давлатҳои Осиё ва Аврупои Академияи илмҳои Ҷумҳурии Тоҷикистон ба АМИТ “Ховар”  хабар доданд, муаллиф бо  шеваи илмӣ ва усули таҳқиқотӣ масоили печидаву мубрам, буҳрон, мушкилоти рӯз ва омилҳои пайдоиши таҳдиду хатар ва хушунату тундагароиро дар кишвари Афғонистон мавриди баррасӣ қарор додааст. Ӯ зимни баррасии масоили зикргардида сарчашмаи пайдоиш, омилҳои шаклгирӣ ва тавсеаи ҳаракатҳои террористӣ ва экстремистиро дар Ҷумҳурии исломии Афғонистон муаррифӣ намуда, роҳҳои таъмини амнияти давлатдории миллӣ ва муқовимат бар зидди ҳама гуна ҳаракатҳои тундрав ва иртиҷоиро нишон додааст.

Китоби мазкур дар шинохти бархӯрди манфиатҳои бузург ва қудратҳои ҷаҳонӣ, ки дар кишвари Афғонистон саҳми калидӣ доранд, аҳамияти ҷиддӣ дорад.

Муаллиф дар асоси санадҳои таърихӣ ва далелҳои қавии таҳлилӣ сабабҳои аслӣ ва калидии буҳрони сиёсӣ, иҷтимоӣ, амниятӣ ва иқтисодии Афғонистонро нишон дода, изҳор доштааст, ки ин омилҳо боиси тақвиятёбӣ ва решадавонии таҳдид ва хатарҳои байналмилалии террористӣ гаштаанд.