Агентии обуҳавошиносӣ: ҳарорати ҳаво дар Душанбе 2 дараҷа паст мефарояд

ДУШАНБЕ, 16.09.2017 /АМИТ «Ховар»/. То охири моҳи сентябр вазъи ҳаво дар кишвар тағйирёбандаи абрнок боқӣ монда, дар баъзе ноҳияҳо пастшавии ҳарорат, бориши боронҳои кӯтоҳмуддат ва раъду барқ пешгӯӣ мешавад. Дар ин бора ба АМИТ «Ховар» аз Агентии обуҳавошиносии Тоҷикистон хабар доданд.

Бино ба иттилои Агентии обуҳавошиносӣ, 16  сентябр дар ноҳияҳои ҷануби кишвар ҳавои тағйирёбанда пешгӯӣ шуда, дар бештари ноҳияҳо аллакай пастшавии ҳарорат ба назар расида, рӯзона гармӣ ба 34  дараҷа мерасад. Ҳаво дар  шимоли кишвар тағйирёбандаи абрнок гашта, пастшавии ҳарорат мушоҳида карда мешавад. Гармӣ дар водиҳо нисбат ба рӯзҳои қаблӣ 2 дараҷа паст шуда, ҳарорат рӯзона ба 32 ва дар ноҳияҳои кӯҳӣ ба 25 дараҷа мерасад.

Обуҳавошиносони кишвар барои сокинони Вилояти Мухтори Кӯҳистони Бадахшон пастшавии ҳарорат ва ҳавои абрноки борониро пешгӯӣ мекунанд. Дар шарқ ва ғарби вилоят ҳаво тағйиёбандаи боронӣ шуда, ҳарорат дар ғарб 22-27 дараҷаро ташкил медиҳад. Дар шарқи он пас аз боридани барф ҳавои ноустувор ва ҳарорати паст пешгӯӣ шуда, ҳарорат дар ин мавзеъ ба 16 дараҷа мерасад.

Дар ноҳияҳои тобеи марказ обуҳавошиносон ҳавои абрнок ва беборишро пешгӯӣ мекунанд. Дар водиҳо ҳарорат рӯзона ба 35 дараҷа мерасад.

Ба иттилои обуҳавошиносони кишвар, дар Душанбе агарчӣ мисли рӯзҳои қаблӣ ҳаво тағйирёбандаи бебориш боқӣ монад ҳам, вале ҳарорат шурӯъ аз имрӯз рӯ ба пастшавӣ оварда, аз 35 ба 33 дараҷа мерасад.