Боздиди ҳайати кормандони Сафорати Ҷумҳурии Тоҷикистон дар Туркия аз шаҳраки саноатӣ дар Анқара

ДУШАНБЕ, 14.09.2017 /АМИТ «Ховар»/. Ҳайати кормандони Сафорати Ҷумҳурии Тоҷикистон дар Ҷумҳурии Туркия ба мақсади шиносоӣ ва омӯзиши таҷрибаи фаъолияти шаҳракҳои саноатӣ дар кишвари иқомат аз Шаҳраки саноатии рақами 1-и шаҳри Анқара боздид намуд.

Тавре аз Вазорати корҳои хориҷии Ҷумҳурии Тоҷикистон хабар доданд, зимни боздид мулоқоти Сафири Ҷумҳурии Тоҷикистон дар Туркия Маҳмадалӣ Раҷабиён бо Раиси ин шаҳраки саноатӣ Айҳан Гокмен баргузор гардид. Дар раванди мулоқот дар баробари дарёфти маълумоти фарогир оид ба таҷрибаи Шаҳрак, ҳамзамон дар робита ба имконияти ба роҳ мондани ҳамкории судманд миёни шаҳраки саноатӣ ва минтақаҳои озоди иқтисодии Ҷумҳурии Тоҷикистон табодули афкор сурат гирифт.

Ҳарду ҷониб дар ин замина сафари ҳайатҳои соҳибкорони ду кишварро бо мақсади шиносоӣ бо фаъолияти ҳамдигар, баррасии имконияти ҳамкорӣ, омӯзиши таҷрибаи пешқадам, таъсиси корхонаҳои муштарак, ворид намудани технологияи нав ва афзоиши гардиши мол муҳим арзёбӣ намуданд.

Ҷонибҳо омодагии худро барои оғози ҳамкорӣ дар соҳаҳои мавриди манфиат изҳор намуда, ба зарурати тақвияти ҷанбаи амалии ҳамкории иқтисодию тиҷоратӣ таъкид намуданд.

Ҳайати Сафорат ҳамзамон бо фаъолияти корхонаҳои алоҳидаи коркарди алюминий, истеҳсоли маҳсулоти плостикӣ, мебел ва дигар корхонаҳо шинос шуд. Шаҳраки саноатии рақами 1 яке аз даҳ шаҳраки саноатии шаҳри Анқара мебошад, ки иқтидори солонаи иқтеҳсолии он ба 6 млрд. доллари ИМА баробар аст.