«Ҳафтаи соҳибкорон – 2017» оғоз гардид

ДУШАНБЕ, 10.10.2017 /АМИТ «Ховар»/. Ба ифтихори Рӯзи соҳибкорон дар Донишкадаи соҳибкорӣ ва хизмати Вазорати саноат ва технологияҳои нави Тоҷикистон «Ҳафтаи соҳибкорон-2017» оғоз гардид. Дар ин бора аз Донишкадаи мазкур хабар доданд.

Бино ба иттилои манбаъ, дар ҷамъомад соҳибкорону олимон ва омӯзгорону донишҷӯён иштирок намуданд. Муовини ректор оид ба корҳои илмӣ ва робитаҳои хориҷии Донишкадаи соҳибкорӣ ва хизмат Саймаҳмуд Саидов иброз дошт, ки соли сеюм аст дар Ҷумҳурии Тоҷикистон Рӯзи соҳибкорон таҷлил мешавад. Дар Донишкадаи соҳибкорӣ ва хизмат низ баргузории чунин ҳафта ҳар сол ба ҳукми анъана даромада, он дар моҳи октябр гузаронида мешавад.

Инчунин иштирокчиён дар мавзӯи «Самтҳои стратегии соҳибкории инноватсионӣ» маърӯза намуда, зикр карданд, ки инноватсияю навоварӣ асосан барои ҷавонон хос аст ва ҷавонон бояд хосиятҳои асосии соҳибкориро бештар омӯзанд.

Ба иштирокчиёни ҷамъомад мушкилоти соҳибкорӣ, роҳҳои объективӣ ва субъективии он фаҳмонида шуда, зикр гардид, ки барои тараққӣ додани соҳибкории инноватсионӣ дар кишвар бояд дар муассисаҳои таҳсилоти умумӣ омӯзиши он ташкил карда шавад, зеро замони муосир инро тақозо дорад.