Дар Шуғнон машқи ситоди фармондеҳӣ бо мақсади пешгирӣ ва бартарафсозии офатҳои табиӣ доир шуд

Октябрь 25, 2017 11:54

ХОРУҒ, 25.10.2017 /АМИТ «Ховар»/.  Дар маркази ҷамоати деҳоти Навободи ноҳияи Шуғнон машқи амалии ситоди фармондеҳӣ  бо ширкати раҳбарони сохторҳои мухталифи мудофиаи гражданӣ баргузор шуд. Сардори ситоди ҳолатҳои фавқулода ва мудофиаи граждании Вилояти Мухтори Кӯҳистони Бадахшон Наим Мираков гуфт, ки “се рӯз пеш комиссияи махсус ҳуҷҷату санадҳо доир ба омодагии идораву муассисаҳо ва хадамоти гуногуни ин ноҳияро ба ҳолатҳои фавқулода мавриди санҷиш қарор дод. Дар  марҳилаи дуюми  машқ тарзи дар амал тадбиқ намудани дониши назариявии ситоди фармондеҳӣ ва гурӯҳҳои наҷотбахш дар мавзеи Шарикхонаи ҷамоати Навобод санҷида мешавад. Ин яке аз мавзеъҳои осебпазир дар баробари офатҳои табиӣ мебошад. Соли гузашта низ сатҳи оби рӯдхонаи кӯҳӣ дар мавзеи мазкур  баланд шуда, оби он аз маҷрои худ берун баромад ва  баъзе киштзору дарахтони сокинонро хароб кард. Аммо кормандони ситоди ҳолатҳои фавқулода ва мудофиаи гражданӣ дар ҳамкорӣ бо сохторҳои худ ва гурӯҳҳои наҷотбахш  нагузоштанд, ки  ин офат ба мардум хисороти бештар расонад”.

Баъди баланд шудани садои бонги хатар дар назди Литсеи техникии маркази ҷамоат лагери муваққатӣ таъсис дода шуда, барои ситоди фармондеҳӣ, гурӯҳҳои наҷотбахш, табибону мутахассисони соҳаҳои дигар  хаймаҳо гузошта шуданд. Дар хаймаи калон ғизо ва либоси гарм омода гардид.

Раиси ноҳияи Шуғнон Азиз Гиёев, ки ҷараёни машқи тактикиро назорат мекард, ба фаъолияти ҳамаи сохторҳои ситоди ҳолатҳои фавқулода ва мудофиаи гражданӣ баҳои баланд дода, изҳор намуд, ки баргузории чунин машқҳо дар манотиқи кӯҳистон аз манфиат холӣ нест.  Ин машқҳо барои пешгирӣ ва коҳиши зарари  офатҳои табиӣ кумаки калон мерасонанд.

Раиси ноҳия ба кормандони ҳамаи сохторҳои  мудофиаи гражданӣ  барои фаъолияти  муташаккилона, ҳамкории зич бо сокинони маҳал, сари вақт расондани кумакҳои тиббию ғизоӣ ба зарардидагон,  интиқоли  техникаву механизмҳо ба ҷои ҳодиса изҳори сипос намуда,  ба кормандоне, ки вазифаи худро софдилона ва касбӣ иҷро намуданд, ифтихорномаҳо тақдим кард.

Октябрь 25, 2017 11:54

Хабарҳои дигари ин бахш

Имрӯз дар водиҳои Тоҷикистон ҳаво то 38 дараҷа гарм мешавад
Бо мақсади пешгирии ҳодисаҳои ғарқшавӣ таҳти унвони «Наҷоти сайёр» дар Душанбе ва ноҳияҳои тобеи ҷумҳурӣ корҳои фаҳмондадиҳӣ оғоз шуд
ҲАВАСМАНДИИ ОМӮЗГОРОН. Давоми 18 сол 3394 нафар омӯзгорони ҷавон дар вилояти Хатлон соҳиби замин гардиданд
Доир ба ташаббусҳои Пешвои миллат дар шаҳри Хоруғ конфронси ҷумҳуриявӣ баргузор шуд
137 акси аксбардори маъруфи тоҷик Заур Дахте ба фонди Осорхонаи миллии Тоҷикистон супорида шуд
Дар ноҳияи Дарвоз оид ба истифодаи сарфакоронаи неруи барқ вохӯрӣ доир гардид
ТАҶРИБАИ НАВ ДАР ЗАФАРОБОД. Дар хоҷагии деҳқонии «Ҳоҷӣ Адҳамхон» 56 адад панели офтобӣ насб карда шудааст
Сокинони ноҳияи Файзобод дар заминҳои наздиҳавлигӣ бештар картошка парвариш менамоянд
ИСТИФОДАИ САМАРАНОКИ ЗАМИН. Сокинони деҳаи Навдеҳи шаҳри Норак таҷрибаи пешқадами кишоварзони ҷаҳонро меомӯзанд
Имрӯз ҳаво дар шаҳри Душанбе то 37 дараҷа гарм мешавад
Дар 86 муассисаи таҳсилоти миёнаи касбии Тоҷикистон аз рӯйи 344 номгӯйи ихтисос мутахассисон омода карда мешаванд
Хиёбони Рӯдакӣ 57: манбаи имкониятҳои рақамӣ дар маркази Душанбе