ВКД ХАБАР МЕДИҲАД…

ДУШАНБЕ, 11.10.2017 /АМИТ «Ховар»/. Сомонаи расмии Вазорати корҳои дохилии Ҷумҳурии Тоҷикистон ҳамарӯза аз ҳолатҳои нохуши садамаҳои нақлиётӣ, дуздию қаллобӣ, ба ҳалокат расидани шаҳрвандон бар асари беэҳтиётӣ ва қасдан расонидани зарари ҷисмонӣ ба саломатӣ хабарҳо нашр мекунад. Ба манзури хавфи иҷтимоии ин ҳолатҳо, ҳушдори одамон ҷиҳати ҳушёрию зиракӣ ва  пешгирии ҳодисаҳои нохуш мо чанде аз ин хабарҳоро бознашр мекунем.

Нозири маркази хизматрасонии филиали «Бонки Эсхата» барои исрофкории 27 ҳазор сомонӣ дастгир шуд

Зимни гузаронидани корҳои фаврӣ-ҷустуҷӯӣ аз ҷониби кормандони милитсия марди 27-солаи сокини шаҳри Душанбе, амалиётгари нозири маркази хизматрасонии филиали ҶСК «Бонки Эсхата» ҳамчун гумонбар дар исрофкорӣ ё азонихудкунии маблағ дастгир карда шуд.

Муайян карда шуд, ки номбурда дар давраи фаъолияти кориаш 16 сентябри соли 2017, аз хазинаи филиали бонк 27 ҳазор сомониро гирифта, аз они худ намуда, ба манфиати шахсиаш сарф намудааст.

Қаллобӣ дар ҳаҷми 20 ҳазор доллари амрикоӣ

Ба мақомоти милитсия марди 45-солаи сокини ноҳияи Файзобод муроҷиат намудааст, ки моҳи ноябри соли 2014 марди 37-солаи сокини ҳамин ноҳия, ки пеш суд шудааст, бо роҳи фиреб ба бовариаш даромада, аз ӯ барои харидорӣ намудани ангишт 20 000 доллари амрикоӣ гирифта, то ҳол маблағашро барнагардонидааст.

Гумонбаршуда аз ҷониби кормандони милитсия дастгир гардида, оид ба ин ҳолат корҳои тафтишотӣ идома доранд.

Зери чарх мондани пиёдагарди хурдсол

10 октябри соли равон, тахминан соати 16:30, ронандаи мошини тамғаи «Портер» Ҳомидов Расул Назирович, соли таваллудаш 1975, сокини шаҳри Исфара, ҳангоми ба қафо ҳаракат кардан дар маҳаллаи Сари ҷари ҷамоати деҳоти Чоркӯҳ ба самти минтақаи Навбунёди шаҳри мазкур, аз уҳдаи идораи воситаи нақлиёт набаромада, пиёдагарди хурдсол Акрамова Омина Валиевна, соли таваллудаш 2015, сокини кӯчаи Навбунёдро пахш намудааст.

Дар натиҷа пиёдагарди хурдсол ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.

Дузд паси панҷара рафт

Ба мақомоти корҳои дохилӣ зани 23-солаи сокини ноҳияи Шоҳмансури шаҳри Душанбе муроҷиат намудааст, ки 27 сентябри соли 2017, шахсони номаълум бо роҳи пинҳонӣ вориди хонаи истиқоматиаш шуда, аз он ҷо 5 ҳазору 760 сомониро дуздида, аз ҷойи ҳодиса ғайб задаанд.

Ҳангоми гузаронидани корҳои фаврӣ-ҷустуҷӯӣ аз ҷониби кормандони милитсия ҷавондухтари 18-солаи сокини пойтахт ҳамчун гумонбар дар содир намудани ҷинояти дуздӣ дастгир гардид.