ВКД ХАБАР МЕДИҲАД…

Октябрь 13, 2017 10:37

ДУШАНБЕ, 13.10.2017 /АМИТ «Ховар»/. Сомонаи расмии Вазорати корҳои дохилии Ҷумҳурии Тоҷикистон ҳамарӯза аз ҳолатҳои нохуши садамаҳои нақлиётӣ, дуздию қаллобӣ, ба ҳалокат расидани шаҳрвандон бар асари беэҳтиётӣ ва қасдан расонидани зарари ҷисмонӣ ба саломатӣ хабарҳо нашр мекунад. Ба манзури хавфи иҷтимоии ин ҳолатҳо, ҳушдори одамон ҷиҳати ҳушёрию зиракӣ ва  пешгирии ҳодисаҳои нохуш мо чанде аз ин хабарҳоро бознашр мекунем.

Маҷбуран кор фармудани зан дар хориҷи кишвар

 Ба мақомоти корҳои дохилӣ зани 54-солаи сокини ноҳияи Восеъ муроҷиат намудааст, ки  1 августи соли 2016, марди 63-солаи сокини шаҳри Душанбе, директори Ҷамъияти дорои масъулияташ маҳдуди «Имкон-2015», бо баҳонаи таъмини кор дар хориҷи мамлакат ӯро ба шаҳри Риёзи давлати Арабистони Саудӣ бурда, муддати 1 солу 2 моҳ маҷбуран кор фармуда, музди меҳнаташро пардохт накардааст.

Марди номбурда аз ҷониби кормандони милитсия дастгир гардид. Аз рӯи ин ҳодиса мутобиқи моддаи 130 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтишот давом дорад.

Ба гарав гузоштани хонаи каси дигар

 Марди 53-солаи сокини ноҳияи Шоҳмансур ба мақомоти корҳои дохилӣ дар он хусус муроҷиат намудааст, ки моҳи сентябри соли 2014, марди 48-солаи сокини кӯчаи Мастонгули пойтахт бо роҳи фиреб ба бовариаш даромада, ҳуҷҷатҳои хонаи истиқоматиашро дар Бонки хурди молиявӣ ба гарав мондаас. Ӯ аз бонки мазкур 150 ҳазор сомонӣ гирифта, то ҳол маблағашро ба бонк насупоридааст.

Марди гумонбаршуда ба қаллобӣ аз ҷониби кормандони милитсия дастгир гардида, аз рӯи ин ҳодиса тафтишот идома дорад.

 

Ҳалокати писарбача дар садамаи марговар

 11 октябри соли равон ронандаи мошини  тамғаи «ЗИЛ» Турсунов Шерзод Тоҷмаҳмадович, соли таваллудаш 1986, сокини шаҳри Душанбе, ҳангоми ҳаракат аз самти деҳаи Фалакони ноҳияи Рӯдакӣ дар рӯ ба рӯи мағозаи хӯроквории «Мадина» аз уҳдаи идораи воситаи нақлиёт набаромада, пиёдагарди ноболиғ Усмонов Муҳсиддин Ғуломович, соли таваллудаш 2008, сокини деҳаи Фалакон, хонандаи синфи 3-юми МТМУ №24-ро пахш намудааст.

Мутаассифона, пиёдагарди ноболиғ бо бардоштани ҷароҳатҳои вазнини ҷисмонӣ дар ҷои ҳодиса ба ҳалокат расидааст.

Бародар ба бародар раҳм накард

 Ба Шуъбаи Вазорати корҳои дохилӣ-1 дар ноҳияи Фирдавсӣ марди 41-солаи сокини шаҳри Кӯлоб муроҷиат намудааст, ки 11 октябри соли равон бародараш, марди 39-солаи сокини кӯчаи Фирдавсии ноҳияи мазкур дар дохили бозори «Саховат»-и шаҳри Душанбе бо корд ӯро 1 маротиба задааст. Дар натиҷа номбурда ҷароҳати вазнини ҷисмонӣ бардошта, дар беморхона бистарӣ шудааст.

Бародари марди ҷабрдида бо гумони авбошӣ аз ҷониби кормандони милитсия дастгир гардидааст.

 

Октябрь 13, 2017 10:37

Хабарҳои дигари ин бахш

ОБОДОНӢ ДАР ДЕҲОТ. Дар деҳаи Роҷи Панҷакент варзишгоҳи мактабӣ ба истифода дода шуд
3010 нафар сайёҳони хориҷӣ манзараҳои нотакрори Ховалингро тамошо намуданд
Дар Хатлон 165 бинои нави муассисаҳои таълимӣ бунёд карда мешавад
6 август дар вазоратҳои рушди иқтисод ва савдо, саноат ва технологияҳои нав, Кумитаи давлатии сармоягузорӣ ва идораи амволи давлатӣ ва Агентии омор нишасти матбуотӣ баргузор мегардад
Имрӯз дар Тоҷикистон гармии ҳаво ба 37 дараҷа мерасад
ТАҚВИМИ АМИТ «ХОВАР»: имрӯз 5 август, сешанбе, 217-умин рӯзи соли 2025 аст
Имрӯз дар Суди Олии иқтисодӣ, Хадамоти иҷро, Маркази тадқиқоти стратегӣ, «Амонатбонк» ва Маркази миллии тестӣ нишасти матбуотӣ баргузор мегардад
Кормандони Кумитаи ҳолатҳои фавқулода ва мудофиаи гражданӣ 20 нафарро аз ғарқшавӣ наҷот доданд
Дар марказҳои саратоншиносии Тоҷикистон низоми муосири бойгонӣ ва интиқоли аксҳои рентгенӣ татбиқ гардид
НИШАСТИ МАТБУОТӢ. Дар ноҳияи Рӯдакӣ беш аз 10 ҳазор ариза барои гирифтани замин дар баррасӣ қарор дорад
5 август дар Суди Олии иқтисодӣ, Хадамоти иҷро, Маркази тадқиқоти стратегӣ, «Амонатбонк» ва Маркази миллии тестӣ нишасти матбуотӣ баргузор мегардад
Дар заминҳои соҳили дарёи Зарафшон ва мавзеи Киштӯдак 1350 бех ниҳоли павловния парвариш карда мешавад