Баррасии масъалаҳои озодии виҷдон ва диёнат дар Парлумон

ДУШАНБЕ, 02.11.2017/АМИТ «Ховар»/. «Қонунгузории Ҷумҳурии Тоҷикистон роҷеъ ба масъалаҳои озодии виҷдон ва диёнат»- таҳти чунин унвон имрӯз дар Парлумони Тоҷикистон семинар доир гардид. Дар он вакилони Маҷлиси намояндагон ва  кормандони  Дастгоҳи  палатаи поёнии Парлумони мамлакат ширкат намуданд.          Муродулло Давлатов, вакили Маҷлиси намояндагон  доир ба озодии виҷдон ва диёнат дар кишвар изҳор дошт, ки дар давоми 25 соли соҳибистиқлолии  ҷумҳурӣ муносибати давлат бо дин ва сиёсати давлат нисбат ба дин якранг набуд. Аз ҷумла, дар давраи ниҳоӣ паҳн гардидани падидаи ифротгароии динӣ дар ҷомеа таъсири манфии худро на танҳо ба суботи сиёсӣ ва амнияти давлатӣ, ҳамчунин ба равобити байни давлат ва дин расонид. Масъалаи маърифати динӣ дар ин давра бисёр муҳим ба назар мерасад ва баланд бардоштани дониши динии ҷавонон метавонад омили паст гардидани ифротгароӣ дар ҷомеа гардад.

Вакили Маҷлиси намояндагон таъкид  кард, ки  бо ҳидояту роҳбарии Президенти Ҷумҳурии Тоҷикистон муҳтарам Эмомалӣ Раҳмон мо ба дастовардҳои беназир мушарраф шудем ва  ҳамаи ин хушбахтӣ ва рангорангии ҳаёти мо-ҷавонон аз баракати сулҳу ваҳдат аст. Вале мутаассифона, афроде ҳастанд, ки ба ин сулҳу субот бо чашми ҳасад менигаранд ва мехоҳанд бо ҳадафҳои касифашон ҷомеаи ороми моро ба гирдоби нооромӣ ва бесуботӣ кашанд. Мардуми тоҷик бояд имконият надиҳанд, ки мазҳабҳои ифротӣ аз хушимонии мо истифода намуда, моро ба монанди мардуми Сурия, Ироқ ва Фаластин бозичаи дасти худ гардонанд.

Ҷавонони мо бояд донанд, ки ворид шудан ба ин равияҳои ифротӣ хеҷ хидмате ба ислом набуда, балки бадном кардани номи мусулмонон ва сиёҳ нишон додани чеҳраи дини Ислом  аст.
Зикр шуд, ки ҷавонони тоҷик имрӯз бояд дар таҳкими Истиқлолият ва ваҳдати миллӣ ва  ободонии  кишвар собитқадам бошанд.