Дар Кореяи Ҷанубӣ Форуми «Имкониятҳои сайёҳии Тоҷикистон» доир гардид

ДУШАНБЕ, 03.11.2017 /АМИТ «Ховар»/. Дар доираи анҷоми парвози техникӣ ҷиҳати ифтитоҳи хатсайри Душанбе-Сеул, ки 31 октябри соли равон ширкати «Сомон Эйр» анҷом дод, аз ҷониби роҳбарияти Кумитаи рушди сайёҳии назди Ҳукумати Ҷумҳурии Тоҷикистон дар ҳамбастагӣ бо Сафорати Ҷумҳурии Тоҷикистон дар Кореяи Ҷанубӣ дар шаҳри Сеул ба доираҳои васеи ширкатҳои сайёҳӣ ва меҳмонон имкониятҳои сайёҳии Тоҷикистон муаррифӣ карда шуд.

Тавре аз Кумитаи рушди сайёҳӣ хабар доданд, дар Форум  маводи иттилоотию таблиғотии ширкатҳои сайёҳӣ ва осоишгоҳу табобатгоҳҳои Тоҷикистон, маҳсулоти ҳунарҳои дастӣ ва мусаввараҳо ба намоиш гузошта шуда, санъати волои навозандагӣ ва рақси тоҷикӣ пешниҳод карда шуд.

Иштирокчиёни ҷамъомад аз Намоишгоҳ ва ҳунарҳои мардумии халқи тоҷик таассуроти амиқ бардошта, ба он баҳои баланд доданд.

Аз ҷониби иштирокчиён таъкид гардид, ки Тоҷикистон воқеан ҳам дорои захираҳои бузурги сайёҳӣ буда, биҳишти рӯи замин мебошад.

Ҳамзамон ҷиҳати ҷалби сайёҳони Кореяи Ҷанубӣ ба Тоҷикистон мулоқоту гуфтушунидҳо анҷом дода шуда, ҳавасмандии ҷониби Корея ба сайру саёҳати Тоҷикистон изҳор карда шуд.

Ҷонибҳо барои густариши ҳамкорӣ ба мувофиқа расиданд.