ДАЪВАТИ ТИРАМОҲӢ ДАР СУҒД: Хуҷанд — дар зинаи охирин

ХУҶАНД, 2.11.2017. /АМИТ «Ховар»/. Шурӯъ аз 1 октябр дар ҷумҳурӣ маъракаи даъвати тирамоҳӣ оғоз ёфт. Имрӯзҳо дар шаҳру ноҳияҳои кишвар, аз ҷумла, вилояти Суғд низ  корҳои сафарбарнамоии ҷавонон ба сафи Қувваҳои Мусаллаҳи мамлакат бомаром ҷараён дорад.

Тавре ба АМИТ «Ховар» аз комиссариати ҳарбии вилоят иттилоъ доданд, то 30 октябр дар миқёси вилояти Суғд маъракаи даъвати ҳарбӣ 90,1 дарсад иҷро гардидааст. То имрӯз аз 18 минтақаи вилоят 10 шаҳру ноҳия, аз ҷумла,  Зафаробод,  Шаҳристон, Кӯҳистони Мастчоҳ, Ҷаббор Расулов, Спитамен, Мастчоҳ, Айнӣ, Бӯстон, Гулистон ва  Истиқлол нақшаи даъвати ҷавонон ба сафи Қувваҳои мусаллаҳро сарбаландона пеш аз муҳлат иҷро намудаанд. Дар ин замина масъулини комиссариати 8 шаҳру ноҳияҳои боқимондаи вилоят низ азм доранд рӯзҳои наздик маъракаи даъвати тирамоҳиро ба анҷом расонанд.

Ҳамзамон бояд гуфт, ки то имрӯз дар байни 18 шаҳру ноҳияҳои вилоят шаҳри Хуҷанд  бо иҷрои 62 фисад дар зинаи охирин қарор дорад. Ҳол он ки чанде пеш роҳбарияти шаҳр дар яке аз ҷаласаҳо масъулини соҳа, хосатан раисони кумитаҳои маҳаллаҳои маркази вилоятро вазифадор намуда буд, ки то  1 ноябр маъракаи даъватро анҷом диҳанд.