ХОҲИШМАНДЕМ ДУРУСТ РАФТОР КУНЕД! КФО «Истиқлол» – ро ба маблағи 21 ҳазор доллари амрикоӣ ҷарима кард

ДУШАНБЕ, 01.11.2017 /АМИТ «Ховар»/. Чемпиони Тоҷикистон оид ба футбол- дастаи «Истиқлол» — и шаҳри Душанбе бо сабаби рафтори бархе аз мухлисонаш дар бозиҳои ниҳоии байниминтақавии Ҷоми КФО-2017 ба маблағи калон ҷарима карда шуд.

Тавре аз хадамоти матбуоти Федератсияи футболи Тоҷикистон хабар доданд, кумитаи назорат ва тафтишоти КФО  “Истиқлол” — ро 7 500 доллари ИМА ҷарима баст. Ин маблағ аз ҷониби бошгоҳ барои рафтори як мухлис  дар бозии ниҳоии байниминтақавӣ бо “Бенгалуру” (1: 0) пардохта мешавад. Дар ин дидор як мухлиси  «Истиқлол» дар охири  бозӣ шишаи пластикиро ба майдон партофт.

Чунин амали мухлисон бори аввал ба қайд гирифта нашудааст. Дар бозии марҳилаи гурӯҳӣ бар муқобили тими «Алай» (3: 1) яке  аз мухлисони дастаи пойтахт ба майдони Варзишгоҳи марказии ҷумҳуриявӣ баромад, ки барои ин амал дастаи «Истиқлол»-ро мақомоти интизомӣ ба маблағи 8 ҳазор доллар ҷарима бастанд.

Дар маҷмӯъ, дастаи «Истиқлол» дар мавсими имсолаи Ҷоми КФО барои рафтори мухлисони хеш дар бозиҳои хонагӣ 21 ҳазор долларро ҳамчун ҷарима пардохт намудааст.

Дар робита ба ин ҳодисаҳо, «Истиқлол» тавассути сомонаи расмии худ ба мухлисон муроҷиат кардааст, ки дар он, аз ҷумла, омадааст: «Мо дар ҳақиқат аз дастгирии мухлисони худ, ки варзишгоҳро пур мекунанд ва воқеан 12-ум бозингари  дастаи мо мебошанд, миннатдорем. Ҳузури Шумо ба бозингарони мо барои ғалаба дар ҳақиқат неру мебахшад. Барои «Истиқлол» бозии басо муҳим -финали Ҷоми КФО-2017 дар пеш аст. Бо шарофати дар арсаи байналмилалӣ ба даст овардани муваффақият аз ҷониби дастаи мо Тоҷикистон макони баргузории бозии ниҳоии мусобиқаи бонуфуз мегардад. Барои тамошои ин бозӣ ба Тоҷикистон меҳмонони сершумор меоянд. Аз ин рӯ, мо ҳамаи шумо, тамошобинони муҳтарамро ба рафтори дуруст зимни тамошои бозӣ, риояи меъёрҳои рафтор дар варзишгоҳ ва ҷойҳои ҷамъиятӣ даъват менамоем. Ҷазоҳои минбаъда аз сабаби рафтори нодурусти бархе мухлисон метавонанд ба ҷаримаҳои вазнин оварда расонанд.

Дастаи футболи «Истиқлол» чунин мешуморад, ки аз рафтор ва амали бархе аз мухрисон ҳазорҳо мухлисони кишвари мо набояд азоб кашанд», — омадааст дар  сомонаи расмии дастаи «Истиқлол» — и Душанбе.