Омӯзгори тоҷик Аълочии маорифи Қирғизистон шуд

Ноябрь 10, 2017 09:55

ДУШАНБЕ, 10.11.2017 /АМИТ «Ховар»/. Бо  фармони Гулмира Кудайбердиева, Вазири омӯзиш ва илми Қирғизистон  ба Истодаой Турсунова нишони «Аълочии соҳаи маориф» тақдим гардид.

Тавре Қодиршои Мурувват, муовини раиси Иттиҳодияи ҷамъиятии тоҷикони Қирғизистон ба номи устод Рӯдакӣ  ба АМИТ “Ховар” иттилоъ дод, номбурда барои саҳми шоиста  дар тарҷумаи китоб ва маводи дарсии тоҷикӣ ба ин ҷоизаи вазорат сазовор шудааст.

Истодаой Турсунова зодаи шаҳри бостонии Панҷакент ва хатмкардаи Донишгоҳи давлатии Тоҷикистон (ҳоло ДМТ)  буда, чанд сол боз бо хонаводаи худ дар шаҳри Бишкеки Қирғизистон зиндагӣ дорад. Ӯ дар дабиристонҳои шаҳрҳои Қӯрғонтеппа ва Панҷакент аз забону адабиёти тоҷик ва хатти ниёгон ба шогирдон дарс гуфтааст. Ин бонуи боистеъдоди тоҷик дар маҳалли зисти нав  низ ором нанишаста, бо таъсиси курсҳои забономӯзӣ ба фарзандони тоҷик забони модарӣ ва таъриху фарҳанги ниёгонамонро  ёд медиҳад. Вай дар фаъолияти Иттиҳодияи ҷамъиятии тоҷикон ба номи устод Рӯдакӣ низ саҳм гузошта, барои муаррифии урфу одат, вижагиҳои ҷашни Наврӯзу Меҳргон миёни сокинони Қирғизистон талош ба харҷ  медиҳад.

Равшанбек Собиров, раиси Созмони тоҷикони Қирғизистон изҳор медорад, ки «саҳми муаллима  И. Турсунова  дар пешрафти корҳои ҷамъиятӣ қобили ситоишу таҳсин аст ва мавсуф ба дарёфти ҳама унвонҳо шоиста мебошад. Чанд сол боз  суманаки наврӯзии Истодаой Турсунова мавриди қабули меҳмонону сокинони Бишкек қарор ёфтааст ва кумаку ҳамдастии ӯ бобати нигаҳдории  суннатҳои миллии мардуми тоҷик дар  ин кишвари ҳамсоя  ҳамвора эҳсос мегардад».

Вазорати фарҳанги Қирғизистон чанд сол қабл ин бонуи тоҷикро бо нишони «Аълочии соҳаи фарҳанги Қирғизистон» низ сарфароз гардонида буд.

Истодаой Турсунова ҳамзамон соҳиби нишонҳои  «Аълочии маорифи Тоҷикистон» ва «Аълочии фарҳанги Тоҷикистон» мебошад.

Ноябрь 10, 2017 09:55

Хабарҳои дигари ин бахш

Дар Душанбе дар мавзуи «Навсозии Чин» конференсия баргузор гардид
Истиқлоли давлатӣ омили калидии сиёсати муваффақи Тоҷикистон дар арсаи байналмилалӣ аст
МегаФон Тоҷикистон бурди миллион сомонӣ ва туҳфаҳои дигари олиҷанобро доир менамояд
Имрӯз дар ноҳияҳои кӯҳии Тоҷикистон ҳаво то 36 дараҷа гарм мешавад
Дар Бохтар ба кӯдакони ятим ва ниёзманд либосҳои мактабию лавозимоти хониш тақдим гардид
Дар палатаи поёнии Парлумони Тоҷикистон бо ҳайати Ҷумҳурии Мардумии Чин мулоқот доир шуд
Дар Тоҷикистон беш аз 1,9 миллион либоси мактабӣ истеҳсол карда шудааст
ОМОДАГӢ БА СОЛИ НАВИ ТАҲСИЛ. Дар Гулистон давраи мутобиқшавии хонандагони синфи якум идома дорад
Имрӯз дар водиҳои Тоҷикистон ҳаво то 39 дараҷа гарм мешавад
Дар Ҳисор ба кӯдакону наврасони ятим либоси мактабӣ ва ашёи хониш тақдим гардид
Имрӯз дар шаҳри Душанбе ҳаво то 37 дараҷа гарм мешавад
Имрӯз дар водиҳои Тоҷикистон ҳаво то 37 дараҷа гарм мешавад