Ш. Зуҳуров: «Мексика дар қораи Амрико барои Тоҷикистон шарики боэътимод аст»

ДУШАНБЕ, 21.11.2017 /АМИТ «Ховар»/. «Ҷумҳурии Тоҷикистон Мексикаро дар қораи Амрико яке аз шарикони боэътимод меҳисобад»,-гуфт Раиси Маҷлиси намояндагони Маҷлиси Олии Ҷумҳурии Тоҷикистон  Шукурҷон Зуҳуров имрӯз зимни мулоқот бо Сафири тозатаъйини Мексика дар Ҷумҳурии Тоҷикистон Ҷузе Алфонсо Зегбе Камарена. Мусоҳибон ҳамзамон  масъалаҳои марбут ба таҳкими ҳамкории байнипарлумонии ду кишварро  матраҳ намуданд.

Шукурҷон Зуҳуров иброз намуд, ки барои ба вуҷуд овардани  пояи қарордодиву ҳуқуқӣ, ҷалби сармоя ва соҳибкорон аз Мексика имзо намудани «Созишнома оид ба канорагирӣ аз андозбандии дукарата ва пешгирии саркашӣ аз пардохти андоз аз даромад ва сармоя», «Созишнома оид ба ҳавасмандгардонӣ ва ҳифзи мутақобилаи сармоягузорӣ» зарурат дошта, барои рушди ояндаи ҳамкории  ҳар ду кишвар такони ҷиддӣ мебахшад.

Зикр шуд, ки ҳамкории мутақобила дар доираи созмонҳои байналмилалӣ ифодагари устувории муносиботи Тоҷикистону Мексика аст. Мексика ташаббусҳои Тоҷикистонро дар масъалаи об, ки бинобар оқибатҳои тағйирёбии иқлим масъалаи  муҳим маҳсуб меёбад, пайваста дастгирӣ намуда, Тоҷикистон ва Мексика узви Панели сатҳи баланд оид ба масъалаҳои об мебошанд. Таъкид гардид, ки ду кишвар имкон доранд дар соҳаҳои илм ва маориф, энергияи тоза, саноати истихроҷи маъдан, технологияҳои муосир ҳамкории мутақобила ба роҳ монанд. Ш. Зуҳуров афзуд, ки Тоҷикистон ширкати фаъолонаашро дар роҳандозии рӯзномаи оби Созмони Милали Муттаҳид идома дода, пайваста барои таблиғи мудирият ва истифодаи оқилонаи ин манбаи барои инсоният ҳаётан муҳим кӯшиш ба харҷ медиҳад. Ҳамзамон зикр шуд, ки Даҳсолаи байналмилалии амал «Об барои рушди устувор», 2018-2028 дар Рӯзи байналмилалии захираҳои об- 22 марти соли 2018 шурӯъ мешавад. Ба ин муносибат Тоҷикистон тасмим дорад, ки тобистони соли 2018 Конфронси байналмилалии марбут ба масъалаҳои обро  дар Душанбе қабл аз Форуми сиёсии сатҳи баланд оид ба рушди устувор баргузор намояд. Дар ин росто, Ш. Зуҳуров дипломати мексикоӣ ва намояндагони баландпояи ин кишварро барои иштирок дар конфронси мазкур даъват намуд.

Ҷузе Алфонсо Зегбе Камарена  ҳавасмандии Мексикаро ба густариши равобити дӯстӣ ва ҳамкории гуногунпаҳлӯ бо Ҷумҳурии Тоҷикистон таъкид намуд. «Ҳарду кишвар дар ҳошияи узвият дар СММ муколамаи судманд ба роҳ мондаанд. Мо метавонем дар оянда роҷеъ ба  ҳамкорӣ дар соҳаи тағйирёбии иқлим, об, рушди устувор, танзими муҳоҷират, ки  дорои зарфият ва иқтидори бузург мебошанд, ҳамкорӣ дошта бошем»,- гуфт дипломати мексикоӣ.