ТОҶИКИСТОН БА ЛИГАИ ЧЕМПИОНҲОИ ОСИЁ РОҲ ЁФТ!

ДУШАНБЕ, 05.12.2017./АМИТ “Ховар”/. Конфедератсияи футболи Осиё рӯзи 4 декабр Тоҷикистонро ба Лигаи қаҳрамонҳои Осиё – мӯътабартарин мусобиқаи байни дастаҳои ин қора роҳ дод. Қаҳрамони соли ояндаи футболи Тоҷикистон метавонад аллакай дар мусобиқаҳои Лигаи қаҳрамонҳои Осиё -2019 ширкат кунад. Ин хушхабарро корманди масъули Федератсияи футболи Тоҷикистон Нуралӣ Хоркашев дар саҳифааш дар Фейсбук нашр кардааст.

Бино ба навиштаи Нуралӣ Хоркашев, ин қарори Конфедератсияи футболи Осиё 4 декабр дар як семинари ин ниҳоди варзишӣ дар шаҳри Куала-Лумпур, пойтахти Малайзия эълон шудааст. Гуфта мешавад, ки Тоҷикистон бо шарофати ҳунарнамоии хуби дастаи «Истиқлол»-и Душанбе дар Ҷоми Конфедератсияи футболи Осиё ба шарафи иштирок дар Лигаи қаҳрамонҳои Осиё даст ёфтааст. «Истиқлол» ду соли охир ба марҳалаи ниҳоии Ҷоми КФО роҳ ёфта буд.