“Авроқун мутафарриқа” (“Парокандабаргҳо”) сеюмин китоб аз Тоҷикистон аст, ки дар Қоҳира ба табъ мерасад

ДУШАНБЕ, 02.01.2018 /АМИТ «Ховар»/. Китоби шоир ва тарҷумони арабизабони тоҷик, узви Иттифоқи нависандагони Тоҷикистон, собиқ Сафири Тоҷикистон дар Мисри Араб  Назруллоҳи Назар бо номи “Авроқун мутафарриқа” (“Парокандабаргҳо”) дар нашриёти “Шамс”-и Қоҳира ба табъ расид, ки муаллиф онро ба хотираи устоди забони арабии худ Ҳасан ан-Наққош бахшидааст.

Ба нақли Назруллоҳи Назар, боби аввали китоб як силсила шеърҳои муаллифро дар бар мегирад, ки ба забони арабӣ дар васфи диёру ҳамдиёрон эҷод шудаанд.

Дар боби дуюм намунаҳо аз ашъори шоирони намоёни тоҷик Мирзо Турсунзода, Мирсаид Миршакар, Муъмин Қаноат, Лоиқ Шералӣ, Бозор Собир, Қутбӣ Киром, Низом Қосим,  Аскар Ҳаким, Гулназар, Гулрухсор, Фарзона, Мавҷуда, Ҳадиса, Меҳринисо, Зулфия, Камол Насрулло, Доро Наҷот, Раҳмат Назрӣ ва дигарон, ҳамчунин намунаи ашъори шоирони кишварҳои бародар – Расул Ғамзатов (Доғистони Россия), Максим Танк (Беларус), Зулфия (Ӯзбекистон) ва Ата Атаҷонов (Туркманистон), ки тайи солҳои гуногун дар матбуоти араб дар тарҷумаи Назруллоҳи Назар нашр шудаанд, гирдоварӣ гардидаанд.

Боби дигари китоб шеърҳои шоирони арабро, аз қабили Муҳаммад Солеҳ Баҳрулулум (Ироқ), Муин Бсису (Фаластин) ва Ҳасан Иброҳим ан-Наққош (Ироқ) дар бар мегирад, ки дар васфи Тоҷикистон гуфта шудаанд.

Китобро тарҷумаи арабии Суруди миллии Тоҷикистон (матни Гулназар) ва шеъри Низом Қосим  “Пешвои миллат”, ки дар ситоиши корномаи Пешвои миллат муҳтарам Эмомалӣ Раҳмон суруда шудааст, зиннат медиҳанд.

Шоистаи ёдоварист, ки дар тарҷумаи ин таблиғгари адабиёти тоҷик ҳанӯз соли 1998 маҷмӯаи шеърҳои бачагонаи Мирсаид Миршакар “Басмату-л-бароъим” (“Табассуми ғунчаҳо”) дар Душанбе, асарҳои саҳнавии Сотим Улуғзода, Меҳмон Бахтӣ ва Ҷумъа Қуддус соли 2002 дар Димишқ ва ашъори ду шоири шинохтаи тоҷик Гулрухсор ва Гулназар соли 2006 дар Кувайт бо номи “Вардатун фи-л-хадди ва ухро фи-н-назар” (“Гули рухсор ва гули назар”) чоп шуда, манзури хонандаи араб гардида буданд.

Бояд зикр намуд, ки “Авроқун мутафарриқа” сеюмин китоб аз Тоҷикистон аст, ки дар Қоҳира ба табъ мерасад. Қаблан  он ҷо китоби “Тоҷикистон: дипломатияи об” ва китоби чорҷилдаи Эмомалӣ Раҳмон “Тоҷикон дар оинаи таърих” пурра ба забони арабӣ нашр шуда буданд.