То ҷашни Наврӯзи байналмилалӣ 45 автобус дар хизмати сокинону меҳмонони пойтахт қарор мегиранд

Февраль 28, 2018 14:32

ДУШАНБЕ, 28.02.2018 /АМИТ «Ховар»/. Тавре  ба  мушоҳида  мерасад,  имрӯзҳо  автобусҳои тамғаи «AKIA», ки   истеҳсоли Корхонаи муштараки тоҷикиву туркии  «AKIA AVESTO» мебошанд,   дар хизмати   сокинону меҳмонони пойтахт  қарор доранд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе  ба АМИТ «Ховар» хабар доданд, алҳол  13 адад автобусҳои тамғаи «AKIA»  ба  мусофирон хизмат мерасонанд ва   то ҷашни Наврӯзи байналмилалӣ  шумораи онҳо  ба  45   адад  хоҳад расид.

Маврид ба зикр аст, ки  бо мақсади навсозии парки техникии шаҳри Душанбе барои харидории 100 автобуси тамғаи «AKIA»  бо дарназардошти бандубасти он дар ҳудуди Ҷумҳурии Тоҷикистон байни мақомоти иҷроияи ҳокимияти давлатии шаҳри Душанбе ва Ширкати туркӣ, ки таҳти бренди «AKIA» фаъолият дорад, шартнома ба имзо расонида шудааст.

Алҳол  дар корхонаи мазкур  бандубасти 13 автобус  ба итмом расида, тибқи муқаррароти шартнома,  дар марҳилаи дуюм боз 15 автобус аз Туркия ба Ҷумҳурии Тоҷикистон оварда  мешаванд.

Хотиррасон менамоем, ки чанде пеш  Асосгузори сулҳу ваҳдати миллӣ –Пешвои миллат,  Президенти Ҷумҳурии Тоҷикистон муҳтарам Эмомалӣ Раҳмон ба корҳои сохтмонии заводи истеҳсоли автобусҳо  «AKIA AVESTO»  оғози расмӣ бахшиданд. Дар оянда масъулони Корхонаи муштарак нақша доранд, ки дар Ҷумҳурии Тоҷикистон истеҳсоли 5 намуд автобусҳои дохилишаҳрӣ ва беруназшаҳриро бо дарназардошти мутобиқати он ба стандартҳои байналмилалӣ ба роҳ монанд.

Бояд ёдовар шуд, ки  баробари ба фаъолият оғоз намудани корхонаи  нав иқтидори истеҳсоли автобусҳо дар як сол аз 250 то 300 ададро ташкил дода, шумораи кормандон аз ҳисоби мутахассисони маҳаллӣ на кам аз 200 нафар хоҳад шуд. Корхонаи мазкур дар муҳлати 1 сол сохта мешавад.

Алҳол шумораи коргарони корхонаи бандубаст  40 нафарро ташкил менамояд, ки ҳамаи онҳо мутахассисони маҳаллӣ мебошанд. Ширкати туркӣ  барои омӯзиш, сайқал додани савияи дониш ва малака дар бандубасти қисмҳои алоҳидаи автобусҳо  барои мутахассисони маҳаллӣ курсҳои омӯзишӣ  роҳандозӣ  намуд.

Тавре мутахассисон иброз доштанд, қисмҳои асосии автобусҳои бандубаст ва истеҳсолшаванда тавлиди кишварҳои пешрафтаи ҷаҳон буда, муҳаррики он истеҳсоли Ширкати «Мерседес Бенз» мебошад, ки дар миқёси ҷаҳон солҳои зиёд шуҳрати беандоза дорад.

Тавре  директори корхонаи  муштараки «AKIA-AVESTO» Асрор Мирзоев зикр кард,    автобусҳои «AKIA»   дорои 26 ҷойи нишаст   буда,  таҷҳизоти гармидеҳу сардкунанда ва низоми идораи электронии он аз  дигар  автобусҳо бартарӣ доранд.

Дар қисми болои дохили автобус мониторҳои калонҳаҷм насб шудаанд, ки барои пахши роликҳои таблиғотӣ ва маълумотдиҳӣ истифода мешаванд. Тугмачаи назди дари мобайн бо аломати маъюбон ба шахсони дорои имкониятҳои маҳдуди ҷисмонӣ имкон медиҳад, ки аз наздик шудани худ ба дар ронандаро огоҳ кунанд.

Февраль 28, 2018 14:32

Хабарҳои дигари ин бахш

Раиси шаҳри Душанбе бо губернатори Ҳукумати мардумии музофоти Шенсии Чин мулоқот намуданд
Рустами Эмомалӣ бо Сафири Ҷопон дар Тоҷикистон Кейко Фурута мулоқот намуданд
Дар Тоҷикистон экспедитсияи сайёҳии «Саёҳат ба қалби Авруосиё-2025» баргузор мешавад
Рустами Эмомалӣ бо Кетрин Мери Рассел мулоқот намуданд
Раиси шаҳри Душанбе Рустами Эмомалӣ бо Раиси Шурои директорони шабакаи телевизионии «Евронюс» Педро Варгас Сантос Давид мулоқот намуданд
Бахшида ба Рӯзи ҷавонони Тоҷикистон ҳамоиши табибони ҷавони шаҳри Душанбе баргузор шуд
Шаҳри Душанбе то соли 2028 пурра ба нақлиёти мусофиркаши барқӣ мегузарад
Даври шаҳрии Озмуни ҷумҳуриявии «Оилаи беҳтарин» баргузор мегардад
«RED BUS TOURS». Дар Душанбе мавсими хатсайрҳои сайёҳии дохилишаҳрӣ оғоз мегардад
Туҳфаи Президенти Тоҷикистон ба иштирокчиёни Ҷанги дуюми ҷаҳонӣ дар ноҳияи Сино супорида шуд
Дар Душанбе ба пешвози меҳмонон-иштирокдорони Конфронси байналмилалии сатҳи баланд оид ба ҳифзи пиряхҳо омодагӣ мегиранд
Бо қарори Раиси шаҳри Душанбе Рӯзи ҷавонони Тоҷикистон дар сатҳи баланд таҷлил мегардад