Дар шаҳри Ҳисор бахшида ба ҷашни Наврӯз 130 ҳазор бех гулҳои садбарг шинониданд

ҲИСОР, 20.03.2018 /АМИТ «Ховар»/. Имрӯзҳо ҷашни  аҷдодиамон-Наврӯзи Аҷам бо рангу бӯи тоза ба кишвари тоҷикон қадам мегузорад. Барои дар сатҳи баланд пешвоз гирифтани он дар шаҳри Ҳисор    корҳои ободонию сабзазоркунӣ    босуръат ҷараён дошта,  тамоми сокинони шаҳраку маҳаллаҳо, кормандони сохторҳои марбута ва  ташкилоту муассисаҳои шаҳр  ба шинонидани гулу дарахтони ороишӣ ва майсазор намудани майдонҳо, ки яке аз суннатҳои Наврӯзи бостонӣ  маҳсуб меёбад,  машғуланд.

Тибқи иттилои директори Раёсати сабзазоркунӣ ва ободонии шаҳри Ҳисор  Фарҳод Файзуллоев, то имрӯз тавассути ҳашарҳои умумии сокинону хоҷагидорон дар ду тарафи  роҳи марказӣ ва шоҳроҳҳои ҳудуди шаҳр ба миқдори  130 ҳазор бех гулҳои садбарг ва 600 бех дарахтони сояафкан, аз қабили арча ва шоҳбулут шинонида шуданд.

Мақомоти иҷроияи ҳокимияти давлатии шаҳри Ҳисор барои таблиғу ташвиқи ин ҷашни таърихии миллати тоҷик миёни ҷавонону наврасон барномаҳои тантанавиро аз рӯзи 16  март оғоз намуд, ки то  25 март идома меёбанд.

Аз  бахши ҷавонони шаҳр ба хабарнигори АМИТ «Ховар» иттилоъ доданд, ки бахшида ба ҷашни Наврӯзи Аҷам 18 март  дар шаҳри Ҳисор  мусобиқаи бузкашӣ ва аспдавонӣ  баргузор гардиданд. Ҳамчунин 21 март дар Қалъаи Ҳисор бо иштироки беҳтарин варзишгарон  баргузории гӯштини миллии ҷумҳуриявӣ дар назар аст.