Дар Душанбе дастрасии занони соҳибкор ба бехатарӣ баррасӣ гардид

ДУШАНБЕ, 05.03.2018 /АМИТ «Ховар»/. Имрӯз дар арафаи Рӯзи Модар дар   Душанбе таҳти унвони «Дастрасии занони соҳибкори Тоҷикистон ба бехатарӣ ва роҳҳои такмили он» ҳамоиш доир гардида, зимни он натиҷаи тадқиқоте, ки миёни 300 нафар занони соҳибкори шаҳрҳои Душанбе ва Ваҳдат гузаронида шуд, баррасӣ гардид. Хабарнигори АМИТ «Ховар» иттилоъ медиҳад, ки дар ҳамоиш намояндагони Парлумон, вазорату идораҳои марбутаи мамлакат,  мақомоти ҳифзи ҳуқуқ ва доираҳои соҳибкорон иштирок намуда,  масъалаҳои марбут ба беҳтар кардани  дастрасии занони  соҳибкор ба бехатариро матраҳ намуданд. Зикр шуд, ки  Ҳукумати Ҷумҳурии Тоҷикистон ҷиҳати ҷалби занон ба соҳибкорӣ ва таъмини бехатарии онҳо тадбирҳои зарурӣ меандешад.

Иштирокдорони  ҳамоиш  роҷеъ ба роҳҳои   беҳтар намудани дастрасии   занони соҳибкори  Тоҷикистон ба  бехатарӣ ва нақши бонувон дар таъмини бехатарӣ, кафолати давлатии занони соҳибкор, нақши милитсия дар  таъмини бехатарии занони соҳибкор,  ташаккули шароити беҳтар  барои  дастрасии занони соҳибкор  ба бехатарӣ, мушкилот ва  роҳҳи ҳалли он  ибрози назар намуданд.

Бояд тазаккур дод, ки тадқиқоти  мазкур аз ҷониби Ассотсиатсияи миллии занони соҳибкори  «Кадбону»  дар ҳамкорӣ бо вазорату идораҳои марбутаи мамлакат  гузаронида шуда, ҳадафаш таъмини амнияти занони соҳибкор, дастгирӣ ва пешниҳоди кумакҳои ҳуқуқӣ ба соҳибкорзанон ҳангоми мувоҷеҳ шудан ба мушкилот, ҳимояи ҳуқуқҳои онҳо, тақвияти ҳамкорӣ байни соҳибкорзанон ва кормандони мақомоти милитсия мебошад.