«СОҲИЛИ ПОК». Дар ҳифзи покии об бояд масъулияти бештар дошта бошем

ХОРУҒ, 15.03.2018. /АМИТ «Ховар»/.  Ҳамасола баъди об шудани барф  шуъбаи муҳити зисти шаҳри Хоруғ  хонандагони муассисаҳои таълимии шаҳрро ба ҳамоиши «Соҳили пок» даъват мекунад. Мудири шуъбаи мазкур Фарҳод Мамадназарбеков гуфт, ки баъди чанд рӯз мардуми тоҷик  беҳтарин ҷашни миллӣ- Наврӯзи бостониро  истиқбол мегирад ва  яке аз фазилатҳои асосии ин ҷашн тозаву пок намудани муҳити зист мебошад.

Дар ҳамоиш наздик ба 100 нафар хонандагони муассисаҳои таълимӣ ва иддае аз сокинони маҳаллаҳои шаҳри Хоруғ ширкат намуданд. Мудири шуъбаи муҳити зисти шаҳри Хоруғ гуфт, ки «дар фасли зимистон иддае аз сокинони маҳаллаҳо, бозору мағозаҳои назди соҳили рӯдхонаҳои Ғунду Панҷ партову ахлотро ба лаби дарё мепартоянд.  Баъди баланд шудани сатҳи об ин ҳама ахлоту партов ба дарё мерезанд ва ҳам ҷонварони зери обро нобуд месозанду ҳам ба саломатии сокинони поёноб зарар мерасонанд. Маълум аст, ки захираҳои обии Осиёи Марказӣ аз кӯлу дарё ва пиряхҳои Бадахшон сарчашма мегиранд. Аз ин рӯ сокиноне, ки дар саргаҳи ин об истиқомат мекунанд, дар ҳифзи покии он бояд масъулияти бештаре бар дӯш дошта бошанд».

Фарҳод Мамадназарбеков гуфт, ки «мутобиқи маълумоти Созмони Милали Муттаҳид то соли 2040 наздик ба 40 миллион нафар одамони сайёра аз беобӣ макони зисти доимии худро тарк мекунанд. Аммо дар кишвари мо захираи кофии оби соф мавҷуд аст ва аҳолӣ бидуни мушкил метавонад асрҳо аз он баҳра барад. Муҳим ин ки нисбат ба ин неъмати бузурги табиат эҳтироми хосса зоҳир кунанд ва онро покиза нигоҳ доранд».

Мутобиқи нақша, ин ҳамоиш то моҳи май идома меёбад ва ба  он тамоми сокинони ноҳияҳои вилоят ҷалб карда мешаванд.