Дар шаҳри Норак чорабинии «Дастовардҳои Истиқлолият» доир шуд

НОРАК, 17.05.2018 /АМИТ «Ховар»/.  Дар Китобхонаи ба номи Дӯстии халқҳои шаҳри Норак чорабинии идона таҳти унвони «Дастовардҳои Истиқлолият» бо иштироки омӯзгорону хонандагон, китобдорон, дӯстдорони китоб баргузор гардид. Дар ин бора мудири шуъбаи рушди иҷтимоӣ ва робита бо ҷомеаи шаҳри Норак Ҳабиба Сафарова ба хабарнигори минтақавии АМИТ «Ховар» хабар дод.

Дар чорабинӣ намояндагони шуъбаю бахшҳои рушди иҷтимоӣ ва робита бо ҷомеаи дастгоҳи раиси шаҳр, маориф, фарҳанг, кор бо занон ва оила, ҷавонон ва варзиш иштирок намуданд.

Дар доираи Соли рушди сайёҳӣ ва ҳунарҳои мардумӣ аз ҷониби наврасон намунаи ҳунарҳои мардумӣ, аз қабили гулдӯзию сӯзанӣ, попурӣ, зардӯзӣ, шероздӯзӣ, расмҳои манзараҳои табиати нотакрори диёр ва ғайра ба маърази тамошо гузошта шуданд. Ҳамчунин намоиши асарҳои тозанашр аз ҷониби китобдорон низ сурат гирифт.

Дар чорабинӣ хонандагону китобдорон бо қироати суруду шеърҳо дар васфи дониш, китоб, Даҳсолаи байналмилалии амал «Об барои рушди устувор», Соли рушди сайёҳӣ ва ҳунарҳои мардумӣ, Ватан, ваҳдату Истиқлолият хотири ҳозиронро шод намуданд. Пешниҳод гардидани саҳначаҳои тарбиявӣ дар бораи гиромидошти китоб бисёр хотирмон буд.