«ОБУ ОТАШ». Дар Душанбе спектакл аз рӯи асари ҳамноми нависанда ва драматурги тоҷик Мансур Суруш такроран ба саҳна гузошта шуд

ДУШАНБЕ, 07.05.2018. /АМИТ «Ховар»/. Бо дархости Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон спектакли «Обу оташ» аз рӯи асари ҳамноми нависанда ва драматурги тоҷик Мансур Суруш, ки нахустнамоиши он ҳанӯз моҳи феврал баргузор гардида буд, 5 май дар Театри давлатии академии драмавии ба номи Абулқосим Лоҳутӣ такроран ба  намоиш гузошта шуд.

Қабл аз оғози намоиш мудири қисми адабии театр, Ҳунарпешаи халқии Тоҷикистон Ортиқ Қодир, ки баъд дар нақши яке аз қаҳрамонҳо рӯи саҳна омад, сухан гуфт. Ӯ ёдовар шуд, ки рӯзе пеш Конфронси байналмиллалии сатҳи баланд анҷом ёфт, ки дар он Президенти мамлакат, Пешвои муаззами миллат муҳтарам Эмомалӣ Раҳмон суханронӣ намуданд ва дар фарҷоми ин чорабинӣ Эъломияи Душанбе қабул гардида, аз ҷомеаи ҷаҳонӣ дар хусуси муттаҳид сохтани неруҳо алайҳи терроризм ва экстремизм даъват ба амал оварда шуд. Ин даъват ба ғояи спектакл ҳамоҳанг аст.

Дар спектакл чунин масъалаҳои ҷаҳони муосир ба монанди таҳаммулпазирӣ, аксуламал ба терроризм ва экстремизм, роҳандозии арзишҳои динӣ якҷо бо арзишҳои дунявӣ, умумибашарӣ дар тарбияи насли наврас дар рӯҳияи ватандӯстию худшиносӣ, одамдӯстӣ, эҳтироми инсон новобаста ба мансубияти ӯ ба дину мазҳаб ва миллату нажод бардошта шудаанд.

Нақшҳои асосиро Ҳунарпешаи халқии Тоҷикистон Носир Ҳасанов, Муҳаммадҷон Шодиев, Асалбек Назриев, Сония Наврӯзова ва дигарон хеле муассир ва боварибахш офариданд. Рассом Нина Панова буда, дар ороиши мусиқавӣ Далер Назаров саҳм дорад.

Бояд гуфт, ки аксарияти тамошобинонро намояндагони аҳли дин, омӯзгорон ва донишҷӯёни Донишкадаи исломии Тоҷикистон ба номи Имоми Аъзам Абӯҳанифа Нуъмон ибни Собит ташкил медоданд.