Парлумон: мавзӯи зӯроварӣ дар оила меҳвари суҳбати вакилон гардид

ДУШАНБЕ, 21.05.2018 /АМИТ «Ховар»/. Имрӯз бо ташаббуси Кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ, таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Хайриниссо Юсуфӣ мизи мудаввар дар мавзӯи татбиқи Қонуни Ҷумҳурии Тоҷикистон «Дар бораи пешгирии зӯроварӣ дар оила» баргузор гардид.

Дар ин бора ба АМИТ «Ховар»  аз Маҷлиси намояндагон хабар доданд.  Тавре  манбаъ  иттилоъ медиҳад, аз рӯи масъалаи мазкур дар назди вакилони Маҷлиси намояндагон муовини якуми Раиси Кумитаи кор бо занон ва оилаи назди Ҳукумати Ҷумҳурии Тоҷикистон Марҳабо Олимӣ,  муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Саида Умарзода ва муовини Вазири корҳои дохилии Ҷумҳурии Тоҷикистон Маҳмадсаид Саидзода  баромад  намуданд. Баромадкунандагон  аз ҷумла, дар бораи  тасдиқи Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023, Барномаи рушди муассисаҳои томактабӣ ва миёнаи умумии хусусӣ барои солҳои 2014-2020, Барномаи ислоҳоти (рушди) милитсия барои солҳои 2014-2020, Нақшаи чорабиниҳо оид ба беҳтар намудани нишондиҳандаҳои Ҷумҳурии Тоҷикистон дар ҳисоботи «Пешбурди соҳибкорӣ»-и Бонки ҷаҳонӣ, Нақшаи чорабиниҳо оид ба беҳтар намудани фазои сармоягузорӣ дар бахши туризм ва чанд санади дигар  ибрози андеша намуданд.

Аз рӯи масъалаи мазкур ҳамчунин дар назди иштирокдорони мизи мудаввар прокурори Раёсати назорати тафтишоти пешакӣ дар мақомоти прокуратура Лутфулло Саидзода баромад намуд.

Дар анҷоми мизи мудаввар коршиносони соҳа  ба саволҳои сершумори вакилони Маҷлиси намояндагон посух гуфтанд.