Сафари ҳайати Кумитаи давлатии амнияти миллии Ҷумҳурии Тоҷикистон ба шаҳри Кобул

ДУШАНБЕ, 09.05.2018 /АМИТ «Ховар»/. 7-9 майи соли ҷорӣ, сафари кории ҳайати Кумитаи давлатии амнияти миллии Ҷумҳурии Тоҷикистон бо роҳбарии Раиси Кумита Ятимов С.С. ба Ҷумҳурии Исломии Афғонистон  баргузор гардид.

Зимни сафар дар шаҳри Кобул вохӯрӣ ва гуфтушунидҳо бо Раиси Сарраёсати амнияти миллии ҶИА Муҳаммад Маъсум Станикзай, Вазири мудофиаи ҶИА Баҳром Торуқшоҳ, Вазири корҳои дохилии ҶИА Аҳмад Вайс Бармак ва мушовири Президенти ҶИА оид ба масъалаҳои амниятӣ Муҳаммад  Ҳаниф Атмар доир шуданд.

Дар рафти мулоқотҳо масоили ҳамкориҳои хадамоти махсуси Ҷумҳурии Тоҷикистон ва Ҷумҳурии Исломии Афғонистон дар самти таъмини амнияти минтақа баррасӣ шуданд. Ширкаткунандагон оид ба  амалӣ сохтани тадбирҳои ҳамоҳангшуда дар муқовимат бо терроризми байналмилалӣ, ошкор сохтани ҳадафҳои ташкилот ва ҳаракатҳои террористӣ, ҷустуҷӯ, муайянкунӣ ва боздошту истирдод намудани аъзои онҳо, мубориза бо гардиши ғайриқонунии маводи мухаддир, пешгирӣ намудани истифодаи сарҳади давлатӣ бо мақсадҳои душманона,  тахрибкоронаю террористӣ, ҳифзи боэътимоди сарҳад ба мувофиқа расиданд.

Ҳайати намояндагии Тоҷикистон аз ҷониби Президенти Ҷумҳурии Исломии Афғонистон Ҷалолатмаоб Муҳаммад Ашраф Ғанӣ пазируфта шуд. Ҷонибҳо иродаю талоши хешро вобаста ба таҳкими муносибатҳои неки ҳамҷаворӣ таъйид намуда, мавқеи ягонаро дар масъалаҳои муқовимат бо хатару таҳдидҳои муосир иброз доштанд.