Бонки Аврупоии Таҷдид ва Рушд ҳамкориро бо Тоҷикистон тавсеа мебахшад
ДУШАНБЕ, 22.06.2018. /АМИТ «Ховар»/. Субҳи имрӯз вохӯрии муовини Сарвазири мамлакат Азим Иброҳим бо ноиби Президенти Бонки Аврупоии Таҷдид ва Рушд хонум Бетси Нелсон, ки бори аввал ба Ҷумҳурии Тоҷикистон ҷиҳати иштирок дар Конференсияи байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» ташриф овардааст, баргузор гардид.
Дар оғоз муовини Сарвазир хонум Бетси Нелсонро хайрамақдам гуфта, зикр намуд, ки Ҷумҳурии Тоҷикистон ҳавасманди таҳкиму тавсеа бахшидани муносибатҳои некбинона бо Бонки Аврупоии Таҷдид ва Рушд мебошад.
Бонки Аврупоии Таҷдид ва Рушд низоми ҳамкории хуб ва судмандеро бо Ҷумҳурии Тоҷикистон роҳандозӣ намуда, аз пешсафони ташкилотҳои байналмилалии молиявие мебошад, ки дар кишвари мо бомуваффақият кору фаъолият мекунад.
Аз ҷониби ин Бонк то имрӯз зиёда аз 120 лоиҳаҳои сармоягузорӣ дар соҳаҳои энергетика, нақлиёт, хоҷагии манзилию коммуналӣ, обтаъминкунӣ ва дигар самтҳои муҳими хоҷагии халқ бо маблағи беш аз 634 миллион евро маблағгузорӣ гардидааст.
Новобаста аз ин дастовардҳои муштарак, ҳамкорӣ дар самтҳои ташаккули шароити сармоягузорӣ, рушди фаъолияти бонкӣ, молиявӣ ва амалӣ кардани лоиҳаҳои афзалиятнок ба дастгирии бештар ниёз доранд.
Бо дарназардошти таҷрибаи андӯхтаи Бонки Аврупоии Таҷдид ва Рушд дар Ҷумҳурии Тоҷикистон, имрӯз фурсате фаро расидааст, ки лоиҳаҳои нави сармоягузорӣ барои солҳои 2018-2020 таҳия гарданд ва механизми маблағгузории онҳо низ муайян карда шаванд.
Муовини Сарвазир зикр кард, ки Ҳукумати Ҷумҳурии Тоҷикистон мутобиқи афзалиятҳои Стратегияи миллӣ, дар самти тавсеа ва рушди истеҳсолоти ватанӣ, тавассути ташаккул додани шароити мусоиди молиявӣ, инфрасохторӣ ва андозию гумрукӣ кӯшишҳои зиёдеро ба харҷ дода истодааст.
Зарур аст, ки барои рушду барқароросозии соҳаҳои воқеи иқтисод, маблағгузории дарозмуҳлат бо фоизи мувофиқи қарзӣ ё грантӣ ба роҳ андохта шавад.
Дар ин радиф ҷонибҳо таҳкиму тавсеа бахшидани ҳамкориҳои мутақобиларо дар бахшҳои фаъолияти бонкӣ, дастрасӣ ба захираҳои молиявӣ, ташаккули бозори энергетикӣ, мутобиқшавӣ ба тағйирёбии иқлим ва дастгирии бахши хусусӣ аз самтҳои муҳим ва саривақтӣ арзёбӣ намуданд.
Дар интиҳо ҳарду ҷониб таъкид намуданд, ки ҳамкориҳои мутақобила минбаъд низ густариш меёбанд ва маблағгузории лоиҳаҳои соҳаи инфрасохтор аз афзалиятҳо боқӣ мемонад.
Дар ҷараёни мулоқот ҳамчунин дигар масъалаҳои муҳими мавриди таваҷҷуҳи ҷонибҳо баррасӣ карда шуданд.
Бо сокинони Ҷамоати деҳоти Пули Сангини шаҳри Норак доир ба шарҳи қонунҳои миллӣ вохӯрӣ баргузор шуд
«ВАРЗИШГАРОН – ПАРЧАМБАРДОРОНИ МИЛЛАТ». Таҳти ин унвон ҳамоиши варзишӣ ва барномаи фарҳангӣ багузор шуд
Дар ноҳияи Шаҳринав тозакунии каналу заҳбур ва заҳкашҳо оғоз шуд
Бунгоҳи тиббӣ ва бинои маъмурии Маркази миллии таълимӣ барои омодасозии наҷотдиҳандагони Тоҷикистон ва Осиёи Марказӣ ба истифода дода шуд
ТОҶИКОН АЗ ОҒОЗИ ТАЪРИХ МИЛЛАТИ ПАРЧАМДОР БУДАНД. Андешаҳои корманди Маркази тадқиқоти стратегӣ
«Ту қалби Тоҷикистонӣ, Душанбе!». Дар ноҳияи Шоҳмансур ғолибони даври ноҳиявии озмун ҳавасманд гардонида шуданд
Имрӯз дар Тоҷикистон ҳавои тағйирёбандаи бебориш дар назар аст
ФУТЗАЛ. Барои мураббиён машғулиятҳои омӯзишии «Level-2» оғоз гардид
Дар Донишгоҳи техникии Тоҷикистон озмоишгоҳи ташхиси партовҳои обӣ ба истифода дода шуд
Ректори Донишгоҳи байналмилалии сайёҳӣ ва соҳибкории Тоҷикистон бо унвони «Профессори фахрӣ»-и ду донишгоҳи Чин сарфароз гардид
ПАРЧАМИ МО ПАРФИШОН АЗ ПЕШВОИ МИЛЛАТ АСТ! Дар Душанбе ҳамоиши ҷашнии ҷавонону варзишгарон баргузор шуд
Дар Хуҷанд доир ба масъалаҳои таъмини ҳифзи сирри давлатӣ ва ҳифзи техникии иттилоот конференсияи минтақавӣ баргузор гардид
