Паҳлавонони навраси тоҷик дар Ҷоми Осиё соҳиби медал гардиданд

ДУШАНБЕ, 22.06.2018 /АМИТ «Ховар»/.  Дирӯз дар  шаҳри Иссиқкӯли Ҷумҳурии Қирғизистон Ҷоми Осиё оид ба дзюдо миёни наврасону ҷавонон оғоз гардид. Дар он 34 нафар (16 нафар миёни наврасон, 18 нафар миёни ҷавонон) паҳлавонони тоҷик иштирок доранд.

Тавре аз Кумитаи миллии олимпии Ҷумҳурии Тоҷикистон ба хабарнигори АМИТ «Ховар» иттилоъ доданд, дар рӯзи аввал қувваозмоиҳо дар вазнҳои -50 кг, -55 кг, -60 кг, -66 кг миёни писарон ва -40 кг, -44 кг, -48 кг, -52 кг миёни духтарон доир гардиданд. Паҳлавонони  навраси тоҷик миёни писарон дар ҳамаи вазнҳо рақобат карда, сазовори 2 медал шуданд. Сулаймони Ҷамшед дар вазни -60 кг соҳиби медали тилло ва Фарорун Мирзошоев дар вазни -55 кг соҳиби медали биринҷӣ гардиданд.

Сулаймон дар даври муқаддамотӣ бар варзишгари ӯзбек Камол Ҳошимов ва варзишгари Қазоқистон Маҳамбет Раҳмет ғолиб омад. Ӯ дар даври нимфинал ва финал варзишгарони Ӯзбекистон Ғанишер Худойбердиев ва Шайхназар Шарифбоевро шикаст дод.
Фарорун Мирзошоев дар даври муқаддамотӣ бар Хонполат Ирисбеков (Қирғизистон), Нурдавлат Амонкоссов (Қазоқистон), Адолат Аскарбеков (Қирғизистон) пирӯз шуда, ба нимфинал роҳ ёфт, вале дар ин давр аз намояндаи Ӯзбекистон Мақсуд Очилов шикаст хӯрд. Фарорун дар рақобат барои ҷои сеюм Даврон Кайратулу (Қазоқистон)-ро мағлуб намуд.

Умед Асматуллобеков дар вазни -55 кг ва ва Бузургмеҳр Сарахонов дар вазни -66 кг ҷои панҷумро ишғол карданд.

Дар рақобатҳо миёни наврасон 200 нафар варзишгар (62 духтар, 138 писар) аз 12 давлат иштирок доранд.

Имрӯз  қувваозмоиҳо дар вазнҳои -73 кг, -81 кг, -90 кг ва +90 кг миёни писарон идома меёбанд.