Туркия барои табодули таҷриба бо Тоҷикистон дар мавриди истифодаи захираҳои об ҳамеша омода аст. Мусоҳибаи ихтисосии муовини Вазири об ва хоҷагии ҷангали Туркия бо АМИТ «Ховар»

ДУШАНБЕ, 21.06.2018 /АМИТ «Ховар»/.  Дар ҳошияи Конфронси байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018-2028» АМИТ «Ховар» бо роҳбари ҳайати Ҷумҳурии Туркия, муовини Вазири об ва хоҷагии ҷангали ин кишвар Алӣ Ризо Дениз мусоҳибаи ихтисосӣ баргузор намуд.

АМИТ «Ховар»: Оид ба робитаҳо миёни Ҷумҳурии Тоҷикистон ва Туркия, ҳамзамон оид ба аҳамияти Конфронсе, ки ҳоло дар шаҳри Душанбе идома дорад, мулоҳизаҳои худро изҳор мекардед.

Алӣ Ризо Дениз: Мо, аъзои ҳайати Туркия аз он, ки дар Тоҷикистон ва дар шаҳри зебои Душанбе қарор дорем, хеле хушҳол ҳастем. Робитаҳо миёни Тоҷикистон ва Туркия дар сатҳи хуб қарор доранд. Мо фарҳанг ва адабиёти муштарак дорем. Аз ҷумла, мероси бузургу пурғановати Чалолиддини Балхӣ мероси муштараки мост.

Аз баргузории Конфронси байналмилалии сатҳи баланд ва даъват шуданамон ба ин ҳамоиш бисёр шод ҳастем. Ҷараёни баргузории Конфронс дар сатҳи хеле олист, ҳайати иштироккунандагони он низ хеле боҳашамат ва олӣ мебошад.

Умедвор ҳастем, ки натиҷаҳои ин Конфронс барои ҳалли масъалаҳои вобаста ба об на танҳо дар минтақа, балки дар ҷаҳон ҳам мусоидат мекунад.

АМИТ «Ховар»: Ҷумҳурии Туркия дар масъалаҳои вобаста ба об кадом тарҳҳоро амалӣ мекунад?

Алӣ Ризо Дениз: Мутаассифона, Туркия аз назари захираҳои обӣ сарватманд нест. Бинобар ин мо маҷбурем захираҳои обро бисёр оқилона ва босамар истифода барем.

Ҳоло мо барои рушди ҳамкорӣ бо Тоҷикистон дар самти табодул ва истифодаи таҷрибаи Тоҷикистон дар масоили об ва захираҳои вобаста ба об талоши бештар мекунем.